Thursday, May 27, 2010

(5)خبر حلو


اتصلت بيها علي الموبايل
دعيت يارب ترد
لا دا واضح اننا اتغيرنا خااااااااااالص ومابئيناش نخاف

الحمدلله ردت

هي: الو
انا: ازيك عاملة ايه؟
هي: لا تمام الحمدلله ...انت اخبارك ايه؟
انا:لااااااا اخباري كويسة جدا جدا
هي: باين من صوتك انك فرحان ومبسوط.... يارب دايما
انا: بصراحة اه و اي انبساط مش عاوز اقولك
هي: طيب ماتفرحنا معاك
انا: دا موضوع طويل ها ابئي احكيهولك بعدين ...المهم انا عاوز منك مساعدة صغيرة كدا
هي: خير..
انا: في الحقيقة ماينفعش في التليفون ...لازم نتقابل
هي: خلاص مفيش مشاكل انا نازلة الشغل الاسبوع الجاي أخلص ورق التأمينات بتاعي
انا: حلو أوي يبئي ميعادنا الأسبوع الجاي ماتتأخريش بئي
هي: لا ان شاء الله مش ها اتأخر عليك
انا: طيب تؤمريني بأي خدمات
هي:متشكرة ربنا يخليك

سلام
سلام

يااااااااااااااه انا طاير من الفرحة
كنت بكلمها بمنتهي الثقة
وافتكرتها وهي بتقولي عاوزة حبك ليا يكون حر ومطلق
يابنت الأيه ..جامدة جامدة
ماهو احساس الحرية اللي بحسه الأيام دي في حبي ليها ماحستوش غير لما اتفجرت جوايا طاقات النور


طبعت ملف الورد اللي كنت بكتب فيه القصة" طاقة نور"
وفاتت الأيام وانا علي وشي ابتسامة مابتفارقنيش
لحد ماجه اليوم اللي قابلتها فيه

كنت قاعد بخلص شغل علي الكمبيوتر في مكتبي
دخلت وسلمت عليا

انا طبعا عاااااااااااادي خااااااااالص ولا كأن كان في أي موضوع بينا

هي: خير مساعدة ايه اللي انت عاوزها مني
انا: في الحقيقة انا بكتب قصة وخلصتها خلاص بس مش عارف احطلها نهاية وكنت عاوزك انتي اللي تحطي النهاية بنفسك
هي باستغراب: قصة؟!!! هو انت اصلا بتكتب قصص انا اول مرة اعرف
انا: ههههههههه لا مابكتبش دي اول مرة بصراحة اكتب فيها قصة وزي ماقولتلك مش عارف اخلصها
هي: وانا اللي ها اخلصهالك؟ اشمعني انا؟
انا: لما تقريها هاتعرفي اشمعني انتي
هي: طيب انت عاوز تكملها ليه ...ايه ناوي تنشرها
قالتها بلهجة تريئه
ضحكت وقولتلها بتريئة برده: لا انتي عارفة انا النشر والحاجات دي مش في بالي
انا مشاغلي كتيير مش فاضي انما دور النشر بتتهافت عليا وماصدئوا اكتب قصة وعاوزين ينشروها قولت مايضرش خدوها انشروها

ضحكت وقالتلي: يا سلاااااااام ....
انا: والله مابهزر هو دا اللي حصل انا نزلت حلقتين منها علي الفيس
هي: مابدخلوش بئالي كتيير
انا: اه ما انا عارف..المهم بعدها لائيت دار نشر بعتالي قالولي انهم عاوزين القصة دي ينشروها وادوني مهلة شهر اخلصها وطبعا انا وافقت
هي: طيب والله الف مبروك ...شكلك طلعت كاتب جامد بئي علي كدا
انا: هاتقري القصة وهاتحددي بنفسك بس ماتتأخريش عليا في النهاية
هي: اوك يناسبك الاسبوع الجاي
انا: موافق

ومشيت ....وكان نفسي تقعد اكتر من كدا بس يلا خلاص فات الكتيير ومابئاش الا القليل

كدا بئي الكورة رجعت تاني ملعبها والمفروض ترد علي حبي ليها

فاتت الأيام ببطء شديد وانا كنت بفكر ياتري هاتكتب النهاية ازاي

اتصلت بيا وقالتلي عاوزة اقابلك بكرة انا ها انزل الشغل ونتكلم
انا استغربت لأن الاسبوع لسه ماخلصش
سألتها: خير في حاجة
هي: لاء ماتقلقش انا بس عاوزاك في موضوع كدا
طبعا ما سألتهاش عن القصة والنهاية لأن واضح فعلا ان في موضوع مهم

تاني يوم كنت قاعد مستنيها بقلق ياتري في ايه

وصلت واول حاجة قولتهالها مالك في حاجة حصلت

ابتسمت وقالتلي انت مالك قلقان ليه ماتخافش مفيش حاجة

قولتلها طيب ينفع ننزل الكافيتيريا نتكلم تحت يكون افضل يعني
هي: وماله ماعنديش مانع
ونزلنا وقعدنا
انا: تشربي ايه؟
هي: لا متشكرة ماتتعبش نفسك
انا بهزار كدا: لاء هاتشربي ..دا امر ها قولي هاتشربي ايه
ابتسمت وقالت: اوك يبئي عصير ليمون
وطلبت 2 ليمون
انا: خير بئي في ايه؟
هي: ثواني .....

وقامت فاتحة شنطتها ومخرجة سكتش رسم واديتهولي

انا: ايه دا
هي: افتحه وانت تعرف
فتحته .....
انا: مش ممكن ...مين اللي رسم الصور دي... انتي؟
هي: اه انا

وانا وعلامات الاندهاش كلها علي وشي مش مصدق نفسي وعمالة اقلب في كراسة الرسم ومش مستوعب اللي انا شايفه

هي كانت رسماني وراسمة ملامح وشي بأكتر من انفعال
بطلت تقليب في الكراسة وقولتلها
من امتي وانتي بترسمي الصور دي

هي: فاكر يوم لما جيتلي وقولتلي ايه مزعلك لما كنت كاتبه علي الفيس عاوزة اسمع خبر حلو
قاطعتها :اه فاكر
هي: يومها فعلا انا كنت مدايئة وزعلانة وعاوزة اسمع خبر حلو انما ماحدش اخد باله اني مدايئة علشان انا ماحبيتش اظهر يعني او ابين دا
لما انت قولتلي كدا انا حسيت احساس اول مرة احسه في حياتي وهو رغبة شديدة في البكاء
ماتخيلتش ان ممكن أي حد في الدنيا ياخد باله اني زعلانة وحسيت ناحيتك احساس كدا ماكنتش عارفة افسره
روحت البيت وفتحت كراسة الرسم بحاول ارسم أي حاجة انفس بيها عن الاحساس اللي جوايا ما انت عارف زي مالكتابة تنفيس الرسم برده
المهم بدون ما اشعر وبدون قصد لائتني برسمك
انا اندهشت وماصدقتش نفسي
بعدها لما اعترفتلي بحبك ليا اتفاجئت زي ماقولتلك ورد فعلي كان حاضر جوايا وهو اني انا مابفكرش في الحب دلوئتي بس منعته ....
روحت البيت وانا جوايا شعور زي ما اكون فرحانة انك بتحبني وجيبت صورتك اللي رسمتها قبلها بيوم وقعدت ابصلها وخلاص من غير ما افكر في أي حاجة
طبعا انا مانزلتش الشغل بعدها لمدة 5 ايام وكان عن قصد مني
كنت عاوزة ابئي لوحدي بعيد عن أي مؤثرات خارجية علشان اعرف افسر الاحساس اللي جوايا
اول درس اتعلمته من التجربة القديمة التأني
وخلال ال5 ايام دول رسمت صورتك كتيير...مرة بتبتسم مرة سرحان مرة منفعل
ولما كنت بنتهي من رسم ملامحك بلائيني مبسوطة
ولما قولتلك دور علي طاقات النور اللي جواك كان لسببين
الأول: وهو انك تتأكد من اللي جواك ناحيتي اذا كان حب فعلا او اعجاب ولو كان حب يكون حر ومن غير قيود
والتاني: وهو اني حسيت جواك حلو أوي انسان طيب ومليان خير و خوفت عليك انك تنجرح من أي حد ماهو بينجرحش اليومين دول غير الناس الطيبين
فلو طاقات النور دي جواك هاتقدر تتغلب علي أي جرح وعملت اجازة مفتوحة علشان الشغل الجديد
علي فكرة مفيش شغل جديد وانا قاعدة في البيت

انا: نعمممممممم ازااااااااااااي ؟!!!!!!


هي: كان لازم اخرج من حياتك علشان تتأكد من اللي جواك وقرارك يكون حر بدون مايتأثر بأي حاجة
انا عارفة انك هاتقولي كان ممكن تفضلي في الشغل عادي ومانتكلمش لحد ما تتأكد من اللي جواك
صدقني انا لو كنت فضلت ادامك حتي لو مفيش كلام عمرك ماكنت هاتعرف تاخد القرار الصح
وكنت واضحة وصريحة معاك من الأول وحكيتلك كل حاجة عني ودا كان معناه حاجة من اتنين يا اخسرك للأبد يااكسبك للأبد
وانا مابئاش ينفع اقبل غير بالمكسب الدايم



انا سكت شوية ورجعت فتحت الكراسة قلبت فيها تاني

وبعدين قولتلها : علي فكرة رسمك حلو أوي ما تأمليش أنك تاخدي السكتش دا تاني
انا صادرته خلاص ها أخده ليا

ابتسمت وماردتش

كملت كلامي وقولتلها:من وسط ناس كتيير اوي بيدخلوا حياتنا ويخرجوا منها ناس قليلة اوي بيسيبوا بصمات جميلة فيها بس ماحصلتش قبل كدا ان حد يسيب بصمة حلوة في حياتك من قبل مايدخلها
وانتي خلتيني ارجع لنفسي ولحياتي ولكل شيء حلو جوايا واحنا لسه ماجمعتناش قصة حب
تعرفي انا علي اد ما بكره الشخص اللي كان في حياتك قبل كدا علشان جرح قلب زي قلبك
علي اد ما انا ممتنله بشكر وعرفان لأنه خرج من حياتك علشان ابئي انا فيها
صدقيني لو قولتلك ان مش بس بحبك بقلبي
لاء دا انا بحبك بعقلي وعيني وروحي وكل حاجة فيا
وبعدين سكت لحظات كدا وقولتلها: تتجوزيني؟

وسادت بينا لحظات صمت

ردت بخجل ووشها احمر: ما سألتش يعني عن نهاية القصة اللي قولتلي أحطها

رديت وانا عارف انها بتوه وبتهرب من السؤال بس كان هروب خجل المرادي

قولتلها: ما انا قولت بلاش احرجك شكلك اصلا لسه ماقريتهاش

هي: لا قريتها وقصة جميلة جدا ماشاء الله عليك اسلوبك حلو في الكتابة

انا: ربنا يخليكي بس بلاش اسلوبك حلو دي اصلها بالعامية فمينفعش تقولي اسلوب


هي: ماشي بالعامية بالعامية ماقولناش حاجة بس بتشد وحوارها شيق
....بس في حاجة ....ممكن تغير العنوان؟


انا: عاوزاني اغيره لأيه؟

هي: "خبر حلو "

ابتسمت وقولتلها: الله عنوان جميل بس ايه هو الخبر الحلو دا

هي وخدودها احمرت اكتر من الأول: الخبر الحلو اني موافقة اتجوزك
وكل اللي حصل من أول ماكلمتك في الموبايل لحد دلوئتي دي نهاية القصة اللي انت طبت مني احطلها نهاية

وفتحت الشنطة وخرجت الورق واديتهولي وقالتلي: اكتب انت بئي النهاية دي بأسلوبك انت

اخدت الورق منها وانا مش مصدق نفسي

وقولتلها : قولي تاني كدا الخبر الحلو ايه اصلي ماكنتش مركز

ضحكت وقالت: يا سلاااااااام....بطل بئي انت سمعت كويس



انا: بجد مش مصدق نفسي....الحمدلله يارب العالمين
ربنا يقدرني واسعدك

هي: ويقدرني انا كمان وأسعدك

ياه أول مرة أشوفها مكسوفة كدا
قمر اوي وهي مكسوفة
طيب بالذمة دي ما احبهاش ازاي
دا لو كانت طلبت مني مليون طاقة نور مش كتيير عليها
ها ادورلها عليهم لحد ما الائيهم كلهم بس ماتضيعش مني ولا تبعد عني



انا: تعالي هنا صحيح ..ايه حكاية جمال مبارك وكريم عبدالعزيز اللي الناس كانوا كاتبينهولك في تعليقاتهم عندك في الفيس

ضحكت وقالت: لا دي حكاية طويلة اوي ها ابئي احكيهالك بعدين.................





الحب دا أجمل حاجة في الدنيا خصوصا لما يكون حر و في الله


.............تمت.........

10 comments:

*الطالبة عفو الله *زوزو said...

تحفة تحفة تحفة

مش عارفة ارد اقول ايه اي تعليق مش حيفيك حقك

بجد قصة في قمة الروعة و الاجمل و الاروع معناها و رسالة لي بتحملها

و الله عيني بتدمع من التاثر بالقصة

حسيتها اوي و شدتني اوي من بدايتها و اكثر حاجة جدبتني هي حتة طاقات النور لي المفروض انها في كل انسان بس مش بنعرف نطلعها

خلتني فعلا اعيد النظر في نفسي و ادور على طاقات النور لي عندي

انا مهما كتبت ف اعجابي بالقصة اكبر

و طبعا ما القصة الا من ابداعك و من روحك الجميلة و جمالها ان دل على شيء فانه يدل على جمال و رقة روحك

تحياتي

و يا رب ما تحرمناش من ابداعاتك

على فكرة انا كمان بحبك اوي بجد

*الطالبة عفو الله *زوزو said...

على فكرة يا قلبي بفكر اقتبس منك حتة من القصة و اكتب عليها بوست
فبستاذنك في اننا اكتب بوست ليه علاقة بالقصة

Maha Shahen said...

جميله القصه وبطريقه مختلفه بتطرح جمال اللحظات الرومانسيه
عارفه لو كل اتنين حاول يعملو نسج بين القصه الدايره بينهم والقصص الجميله اللي بنقراها او نسمع عنها هنعيش اسعد حياه بس يا رب يكون نسج لخيوط قصه جميله وبجد مش خيالات واوهام للايقاع بقلب حد معين
بحب جدا النهايات الجميله بس بطرق مختلفه لم تذكر من قبل ويمكن دا بيخلق ليها روعه انتى تفردتى بيها
بجد قصه جميله ودايما فى تقدم مستمر

قلب ينبض لله said...

زوزو الجميلة

ماشي ياقمر اتفضلي خدي اللي انتي عاوزاه واكتبي اللي تحبيه

انا مستنية اشوف هاتكتبي ايه :

قلب ينبض لله said...

زوزو الجميلة

متشكرة علي كلامك وتعليقك علي القصة
بجد والله كلامكوا دا دفعة ليا اني اكتب تاني وتالت

عارفة يازوزو مع كل مشكلة بنمر بيها بتتفجر جوانا طاقات نور وعلشان تتفجر الطاقات دي لازم نرجع لربنا الأول ويرضي عنا ويسسامحنا

بجد نورتيني:)

قلب ينبض لله said...

nour shahen

بعض احداث القصة من نسج الخيال والبعض الآخر من نسج الواقع :)

بجد زيارتك الأولي في المدونة اسعدتني جدا

بس قوليلي بئي انتي متابعة القصة من زمان علي كدا

بجد المدونة نورت :)

مـجـنـووون said...

الله ينور
قصه جميله جدا وربنا يجمع بنهم علي خير

تقبل مروري
مجنووون

momken said...

حلوة اوى اوى تسلك ايدك


وانا متفق جدا مع بطله القصه بتعتك ان الحب بدون حريه بيكون اى شىء اخر غير الحب

ممكن تعود ممكن عشره ممكن التزام ممكن مسئوليه
لكنه ابدا مش حب

القصه ماثره جدا وعكيقه اوى وبتلمس اماكن نادر لما حد يقدر يلمسها



انتى بحق مبدعه

دمتى فى غايه التالق


تحياتى

قلب ينبض لله said...

مجنووون

آمين يارب العالمين ربنا يجمع بين اي اتنين بيحبوا بعض علي خير :)


نورتني :)

قلب ينبض لله said...

momken

ايه دا انت قريت القصة كلها :)
يعني دي حاجة تبسطني جدا

اه لعلمك بطلة القصة دي اتعلمت كتيير اوي من التجربة القديمة

دمت انت ايضا مبدعا :)