Sunday, October 10, 2010

شيكولاتة بالبندقِ...10



مفيش كام دقيقة ونهلة اتصلت عليا قولت لنفسي مش محتاجة تتصلي عليا علشان تفكريني بوجودك في حياتي ولا بالعلاقة اللي مابينا...انا فاكرة من غير حاجة....اتصلت اكتر من مرة وانا مافتحتش عليها...ماكنتش قادرة اتكلم مع أي حد...انا بس مستغربة الدنيا ...

تاني يوم الصبح كلمت نهلة واعتذرتلها علشان ماقدرتش ارد عليها امبارح لأني كنت مخنوقة

واحنا بنتكلم لاقيتها بتقولي: نغم انا في حاجة عاوزة اقولك عليها...بس اوعديني انك تسامحيني

انا: خير يانهلة قولي في ايه

هي: بخصوص الكلام اللي قاله حسام عليكي

انا: ماله؟

هي: بصي انا ضميري بيأنبني من ساعة ماقولتلك

اه ماهي عمالة تطبل علي دماغي...ايوا هاتقولي ان حسام ماقالش عليكي حاجة وان دا كلامي انا .... ويطلع حسام بريء ويبقي في الحالة دي لازم اصرف نظر عنه ولازم اثبتلها اننا كنا زمايل وبس وخصوصا ان حسام دلوئتي بقي موجود في ساحة المعركة...ومن كلامه آخر مرة معايا قلبي بيقولي الله اعلم يمكن يحصل نصيب

هي: الو الو نغم انتي فين ....الشبكة بتقطع ولا ايه

انا: اه شكلها كدا...المهم كملي كنتي بتقولي ايه

هي: بخصوص الكلام اللي قاله....

قاطعتها وقولتلها: ايوا ايوا ماله

هي: هو قاله بس مش بنفس الاسلوب اللي انا قولتلهولك...

انا: اللي هو ايه الاسلوب دا

هي: هو قال انك معجبة بيه والله اعلم اذا كنتي بتحبيه ولا لآ دي حاجة مايقدرش يجزم بيها..بس قال ان عينيكي كانت فاضحاكي وقرا فيها انك نفسك تبقوا لبعض بس للأمانة هوقالي انه بيعزك جدا زي اخته لانك انسانة بسيطة...انما ماقالش انك بترسمي عليه وعاوزة توقعيه ...دا كان كلامي انا مااعرفش ليه قولت كدا وبالاسلوب دا

والله يعني عينيا فاضحاني اهو ماشاء الله...والبيه كان شايف وعارف وفي الآخر زي اخته

انا: خلاص يانهلة انتي بتتكلمي في ايه يقول ولا مايقولش خلصنا من الحكاية دي بقالنا قرن دلوئتي

نهلة: يعني انتي مش زعلانة مني ومسامحاني

انا: يانهلة قولتلك خلصنا من الموضوع دا خلاص انتي ليه مش عاوزة تصدقي.....بقولك ايه لازم اقفل دلوئتي هاابقي اكلمك بعدين

سلام

سلام

المرادي نهلة مابتكدبش عليا لانها قالتلي انه قال عليا اني انسانة بسيطة ودا كان وصفه ليا دايما اني ابسط بنت عرفها في حياته...دا غير ان فعلا انا كنت معجبة بيه وكان باين في عينيا مااقدرش انكر حاجة زي دي وكمان حاجة ماتزعلنيش اوي انه قال كدا لخطيبته ...واحد بيتلخبط في اسم خطيبته وبيناديها بااسمي وهي سألته عني كان لازم يقولها انا ابئي مين واكيد الكلام جاب بعضه وقال اللي قاله عليا ....هو مااتبلاش عليا في أي حاجة من اللي قالها...واه انا بحبه وقعدت الشهور اللي فاتت دي كلها علي امل انه يرجع ونكون لبعض...صحيح انا مااعرفش ايه فيه مختلف عن الناس يخليني احبه..بس انا فعلا بحبه

....

بس برده انا مااعجبتش بيه من البداية مني لنفسي كدا...هو اللي فضل يشاغلني لحد مااتعلقت بيه....حتي لما جه يطلب ايدي ماحسيتش منه حاجة تقول انه بيحبني.....هو اتقدملي وهو شبه متأكد اني هااوافق...اه ومااوافقش ليه ما انا معجبة بيه وشايف دا وقاريه كويس في عينيا

بعدها بيومين لاقيت موبايلي بيرن

انا: ايوا مين بيتكلم

هو: انا حسام يانغم...دا رقمي انتي ماسيفتهوش من المرة اللي فاتت ولا ايه

انا: مرة ايه؟

هو:لما بعتلك من عليه الرسالة لما كنتي بتتمشي بعد الشغل من كام يوم كدا

انا:اه اه افتكرت..نسيت اسجله ...هو دا رقمك الجديد خلاص

هو: اه سيفيه بئي

انا: ان شاء الله

هو:نغم انا عاوز اكلمك في موضوع ضروري ...ينفع النهاردا بعد الشغل

انا: موضوع ايه؟

هو:لو ينفع في التليفون كنت قولتلك

انا:ووماينفعش اقابلك بعد الشغل غير لما اعرف ايه هو الموضوع

هو:صدقيني ماينفعش اقولهولك في التليفون

انا: خلاص قولي بخصوص ايه

هو: بخصوصي وبخصوصك

انا: طيب بعد الشغل انا هااخرج اتمشي زي المرة اللي فاتت

هو: لا ماينفعش اقوله واحنا بنتمشي ..ايه رأيك نقعد في الكافية اللي قعدنا فيه آخر مرة قبل مااسافر

انا: لا مفيش كافيهات....تقولي الموضوع واحنا بنتمشي

هو: مالك يانغم انتي ليه بتكلميني كدا

انا: هو دا كلامي ....

هو:لا دا مش كلامك ...انتي في حاجة مغيراكي...مش هااطول عليكي لما نتقابل نبقي نتكلم في الموضوع دا

سلام

سلام

بعد الشغل اتمشينا سوا وقاللي: ايه بئي اللي مزعلك ومغيرك كدا

انا: مفيش حاجة مزعلاني ....وانا مش متغيرة ..انا زي ما انا

هو: لا آخر مرة انتي كنتي مدايقة جدا وقولتيلي ادعيلي ابئي كويسة

انا:اه دا كانت مشكلة في الشغل

هو: بس انا عارف ان الشغل مابتحصلش فيه مشاكل تزعل وتدايق الناس بالشكل دا..انتي ناسية اني كنت معاكي في نفس الشغل

انا: ماقولتليش ايه الموضوع المهم اللي انت عاوزني فيه

هو:مش بقولك اتغيرتي

مارديتش عليه وفضلت انا وهو بتاع دقيقة كدا مابنتكلمش

لحد ماقال: نغم ....انا سافرت تونس وحوشت مبلغ كويس يساعدني اني ابدأ حياة جديدة ومستقرة مع الشخص اللي اختاره قلبي واتمني يكمل عمره معاه

انا: كويس اوي ...ربنا يوفقك...بس الشخص دا موافق انه يكمل هو كمان عمره معاك ولا لاء

هو: ماهو دا الموضوع المهم اللي انا عاوزك فيه

انا: انا اعرف الشخص دا وعاوزني اكلمهولك مش كدا؟

هو: لا يانغم..مش عاوزك تكلميهولي انا عاوزك توافقي تكملي عمرك معايا

انا: بالسهولة دي؟!

هو: مش فاهم

انا: اصلك بتتطلب مني الارتباط ونسيت حاجة مهمة جدا

هو: اللي هيا؟

انا: اني اكون مرتبطة

هو: انا سألت وعرفت انك ولا اتخطبتي ولا اتجوزت

انا: وهو دا الارتباط في نظرك

هو: هو في ارتباط تاني غير الخطوبة والجواز

انا: اه طبعا في....الحب .....انت بتغلط نفس الغلطة لتاني مرة..متخيل ومتصور ان قرار ارتباطنا ببعض مش محتاج غير مبادرتك وانا في أي وقت هاابئي مبسوطة بالمبادرة دي وهااوافق اني ارتبط بيك سواء دلوئتي او بعد سنة... سواء كنت في مصر او سافرت تونس...

كان مندهش جدا من كلامي

وماردش

قولتله :انا اسفة لازم امشي...

هو: لا انا اللي آسف ....انتي عندك حق انا للمرة التانية بغلط نفس الغلطة .....كنت فاكر اني بُعدي عنك هايخليني انساكي وابطل احبك...بس اكتشفت اني لما بعدت عنك حبيتك اكتر واكتر

عندك حق انا فعلا غلطت لما طلبت ارجع تاني شغلي في مصر رغم ان مرتبي هاينقص كتير بس قولت فلوس الدنيا كلها ماتساويش قربي منك وغلطت لما فرحت لما لاقيتك لسه ماارتبطيش بحد

انا اللي آسف يانغم اني حبيتك وحسيت منك احساس ترجمته لتاني مرة غلط

معلش ماتزعليش مني اصلي خريج تجارة مش خريج السن فتلاقيني خايب في الترجمة واللغات.....

وبعدين سابني ومشي انا وقفت متنحة في مكاني

وببص عليه لحد ماتاه وسط الناس والزحمة

هو قال ايه !!!!..بيحبني!!...راجع مصر علشاني!!!...فرح لما لاقانني لسه ماارتبطش

يومها فضلت صاحية طول الليل بعيط...

زعلانة من الدنيا ...اللي خلتي اقابل نهلة وقربتنا من بعض اوي كدا....زعلانة منها علشان اليوم اللي فضلت مستنياه طول عمري علشان اسمع فيه من الشخص اللي حبيته بجد ومن قلبي انه بيحبني يكون بيقولهالي بلوم وعتاب واسف انه حبني واتعلق بيا

الصبح وانا بلبس مالاقيتش الساعة بتاعتي دورت عليها في كل مكان مالاقيتهاش

دا انا كنت لابساها امبارح...اكون نسيتها في الشغل ولا وقعت مني ......ما انا ناقصة الساعة هي كمان

وانا في الشغل سألت زمايلي اللي معايا في المكتب عليها ماحدش شافها

بس واحدة زميلتي قالتلي اسألي الفراش اللي مسئول عن نضافة المكتب بتاعنا

روحت وسألته قالي انه متعود لما يلاقي أي حاجة يعينها عنده في صندوق ولو حد ضاعت حاجة منه يدورله عليها في الصندوق دا

فتحلي الصندوق وهو بيدور لاحظت حاجة غريبة جدا

قولتله ثواني ثواني

مديت ايدي في الصندوق وخرجت قلب سلسلة

مش معقول...دا قلب سلسة نهلة اللي ضاع منها بعد مارجعنا من اسكندرية بااسبوع.....ايه اللي جابه هنا؟

سألت الفراش: بتاع مين قلب السلسة دا

هو: وانا لو اعرف بتاع مين هااخليه عندي ليه

انا: انت لاقيته فين وامتي

هو: دا من زمان اوي لاقيته هنا في الدور

انا: طيب شكرا

نهلة كانت هنا في قسم العلاقات العامة من بعد مارجعنا من اسكندرية باسبوع....جاية تعمل ايه وجاية تسأل علي مين

اتصلت عليها

انا: ايوا يانهلة انتي فين؟

هي: في البيت

انا:طيب البسي وتعاليلي دلوئتي حالا في الشغل...محضرالك مفاجأة

هي: مفاجأة ايه؟

انا: لاااااااا لما تيجي هاتعرفي كل حاجة..ماتتأخريش بس

هي: لا جايالك علي طول

فاتت ساعة بالظبط وكانت عندي في المكتب

اخدتها وروحت لعم حسين

وطلبت منه الصندوق اللي بيعين في الحاجات اللي بيلاقيها

فتحتهولها وطلعت منه قلب السلسة بتاعتها

قالت بتوتر: معقول يانغم انتي لاقتي القلب دا فين؟

انا: مش هاتصدقي.....عم حسين لاقاه هنا في الشغل

سكتت

كملت كلامي وقولتلها: مش دا القلب اللي ضاع منك بعد مارجعنا من اسكندرية باسبوع وقولتيلي انتي مش فاكرة هو ضاع منك فين

مابترديش عليا ليه...بصي في عينيا وكلميني...كنتي عارفة ان انا نغم اللي خطيبك كان بيغلط في اسمك ويناديني بيها..كنتي عارفة انه انا هي وعاملة نفسك ماتعرفيش ....

هي: ايوا كنت عارفة ان انتي هي وماتعمليليش فيها دور البريئة الضحية

اذا كنت خبيت عليكي انتي كمان خبيتي عليا..وكدبتي عليا في مكان شغلك

انا: ماسألتيش نفسك انا ليه كدبت عليكي ..ليه ماقولتلكيش الحقيقة...لاننا بقينا اصحاب وانا كنت شارياكي ومقدرة اللي مابينا وماحبيتش اجرح احساسك وقولت كدا ولا كدا هو مش موجود يبقي مفيش لزوم تعرفي ....

لا ويوم السينما لما نطقت اسمه...اتفاجئتي وعملتي نفسك مش عارفة وسمعتيني كلام جارح علي لسانه...حتي لو كان هو اللي قاله وانتي عارفة ان انا البنت دي ماكنتيش تقولهولي وتجرحيني بالشكل دا

هي:برده انتي كدبتي عليا ...لما قولتيلي ان هو بالنسبالك مجرد زميل وهو بالنسبالك كان اكتر من كونه زميل ...

انا: بس انا بالنسباله كنت زميلة وبس واظن هو دا اللي يهمك انا ابئي ايه بالنسباله مش هو يبقالي ايه....

انتي ساكتة ليه مابتتكلميش ..واجهيني

هي: عاوزاني اقولك ايه...اقولك اه انا غلطانة وكدابة وكنت بمثل عليكي علشان ترجعيله وانتي ضميرك مرتاح انك ماظلمتنيش ولا خونتي الصداقة اللي مابينا

انا: ارجعله؟؟؟؟؟؟؟؟ يعني انتي عارفة انه رجع من السفر

هي: اه عارفة

انا: يعني لما جتيلي المكتب تصالحيني علشان تفضلي في حياتي وتبقي العقبة في رجوعي ليه....

تصدقي اه ...انا ازاي مااخدتش بالي...ازاي ماربطتش الأحداث ببعضها....ايوا صح كدا ..وعلشان تقطعي عليا كل الطرق والحجج في اني ممكن اقول عليكي كدابة واصدق انه ماقالش عليا أي كلام..اتصلتي تقوليلي هو ماقالش عليكي حاجة دا انا اللي قولت وسامحيني وارجوكي وعلشان خاطري يانغم

هي: ايوا كدا اظهري وباني ...انتي نفسك ترتبطي بيه انا ماغلطتش بئي لما قولت انك حاطة عينك عليه

انا: نهلة تسمحيلي بسؤال واتمني يكون عندك الشجاعة وتجاوبيني بصراحة

هي:اسألي

انا: انتي حبيتي حسام؟؟؟؟

هي: لا ماحبيتوش ...دا مايملاش عيني وانسان ممل وكداب و....

قاطعتها وقولتلها: لما هو فيه الصفات دي كلها ...شاغلة بالك بيه ليه...هو كدا كدا هايرتبط بغيرك

هي: يرتبط بأي حد الا انتي

انا: يااااااااااه للدرجادي انا مسببالك ازمة...بصي يانهلة احب اقولك ان فعلا انا وحسام هانرتبط ونصيحة مني والله بقولهالك بحب ومن قلبي ماتوقفيش حياتك علي حد ..ابدأي حياة جديدة مع شخص جديد يقدرك ويسعدك

صحيح ان صداقتك بيا كانت تمثيل...بس انتي جواكي انسانة كويسة

هي: هاترتبطوا فعلا؟

انا: الله اعلم ...بس انا غلطت غلطة كبيرة وصدقيني هااعمل المستحيل علشان اصلحها

متشكرة يانهلة علي كل اللي عملتيه فيا ومعايا...بس انا اتضحلي النهاردا شيء مهم ان الكدب والزيف والتمثيل عمرهم قصير في الدنيا...والحاجة اللي بجد ومن القلب بتستمر وبتدوم مهما كانت الظروف

اديتها قلب السلسة بتاعتها ومشيت من عندي وقعدت انا افكر في اللي عملته مع حسام والكلام البايخ اللي قولتهوله ….لا عاملة نفسي بستنبط النتايج وبقوله بتغلط نفس الغلطة لتاني مرة

دا انا اللي بغلط نفس الغلطة تاني وبعاملة بمنتهي قلة الزوق...زعلانة علشان نهلة قالتلك انه كان عارف انه معجب بيكي..كرامتك وجعتك مش كدا...لا انتي كدا تمام ونعم التصرف ورد الفعل بصراحة

لا وقولتله اني مرتبطة وبحب...لا والله انتي هايلة بصراحة كل يوم والتاني بتثبتيلي انك متألقة في الذكاء والزوق

اتصلت عليه ماردش....كررت الاتصال اكتر من مرة وبرده ماردش

حقه بصراحة...طيب اعمل ايه واوصله ازاي...

انا مش هااسكت غير لما اصلح اللي انا عملته..مش هااسيبه يضيع مني تاني

جاتلي فكرة........

نزلت لواحدة زميلتي في الحسابات وقولتلها ان حصل سوء تفاهم بيني وبينه وبتصل عليه وهو مابيردش وطلبت منها تكلمه وتقوله ينزل الشغل لأي سبب

المهم هي كلمته وقالها انه يومين ولا حاجة وهاينزل الشغل

وانا اليومين دول عدوا عليا كأنهم سنتين

اول لما جه الشغل حاولت اكلمه ماعرفتش ....استنيت وهو ماشي نزلت وراه وناديت عليه

هو: ازيك يا انسة نغم

انا: ايه انسة دي.....مش انت بتناديني بنغم بس

هو: انتي عارفة الدنيا بئي مابتفضلش علي حال

انا:انت زعلان مني مش كدا؟

هو:بصي لو هاتقوليلي معلش وماكانش قصدي فمالوش لزوم...انا متفهم الوضع ....انتي مرتبطة وبتحبي ودا حقك..انا ماادتكيش أي وعد قبل السفر تستنيني بيه

انا: ولو قولتلك ان انا فعلا كنت مستنياك ....

هو بااستغراب: مستنياني؟؟؟

انا: اه مستنياك ....وماحبيتش ولا عرفت احب حد غيرك

هو: انتي بتتكلمي بجد

انا:وهي الحاجات دي فيها هزار

هو: طيب ليه قولتيلي الكلام اياه..وليه كنتي متغيرة من ناحيتي

انا: ممكن اجاوب علي السؤال دا بعدين....كل اللي اقدر اقولهولك دلوئتي اني كنت فاهمة الدنيا غلط

هو: اقولك سر

انا:انا بحب الاسرار جدا

هو:انتي كنتي وحشاني بشكل غير عادي

اتكسفت اوي وقولتله: طيب بالنسبة للبتاع هاتعمل في ايه

ابتسم وقالي: اااااااه البتاع ..لا كل خير ..انا عاوزك تطمني خاالص

اهو انتي كدا نغم بتاعة زمان....اللي قلبها شبه الشيكولاتة بالبندق...بيدينا احساس بالسعادة

ابتسمت وقولتله: انت لسه فاكر

هو: عمري ما هنسي اليوم دا...اليوم اللي قابلت فيه احلي واجمل وارق وابسط نغم في الدنيا


تمت

Tuesday, October 5, 2010

الجزء الثاني من شيكولاتة بالبندق


الجزء الثاني من شيكولاتة بالبندق تجدونها علي هذا الرابط

نتمني لكم مشاهدة ممتعة اقصد قراءة ممتعة

:) :) :)