Thursday, July 29, 2010

(5)....شيكولاته بالبندق


مانزلتش الشغل بعدها بكام يوم وكان كل اللي طالع عليا ايامها: ليه كدا يانغم ليه كدا يانغم

كنت حاسة اني جرحته ..بس كنت برجع واقول انه هو كمان جرحني قبل كدا ورجع يجرحني تاني

وهو لما يقولك عاوز اتقدملك يبقي بيجرحك

اه طبعا...انا مش مركونة علي الرف وقت مايعوزني يلاقيني ...

انا ماغلطتش فيه...لاغلطتي..لاماغلطتش...انا قولت اللي حصل وهو حتي ماعرفش يرد عليا




وفي وسط المعمعة اللي انا فيها دي لاقيته بيتصل بيا علي الموبايل واندهشت جدا لأن دي اول مرة يتصل فيها بيا من يوم ما اخد رقم موبايلي

خير اللهم اجعله خير



انا: السلام عليكم

هو: وعليكم السلام ورحمة الله ...ازيك يانغم

انا: الحمدلله كويسة....

هو: مالك يانغم خير في حاجة....انا ملاحظ انك مابتجيش الشغل بقالك فترة

انا: لا ابدا انا كويسة بس هيا شوية ظروف في البيت

هو: خير يعني ولا ايه

انا: لا كل خير مفيش حاجة

هو: طيب انتي هاترجعي الشغل تاني امتي

انا: ليه في حاجة حصلت؟

هو:لا اصل كنت عاوز اكلمك في موضوع كدا وانتي غايبة بقالك فترة فقولت اطمن عليكي

انا: موضوع ايه خير؟

هو: لما ترجعي بقي هاتبقي تعرفي



قفلت معاه وانا بسأل نفسي ياتري موضوع ايه اللي عاوز يكلمني فيه

يكون عاوز يتقدم تاني..لا لا مستحيل...هو اتقدم مرة وانا اديتهومله تمام يعني عمره ماهيفتح معايا الموضوع تاني

يكون مثلا عاوز يعاتبني ويقولي ايه اللي قولتهولي دا...لا ما اعتقدش كان عاتبني في الموبايل وبعدين هو كان بيكلمني عادي وواضح انه مش شايل مني ولا حاجة



فات يوم واليوم اللي بعده رجعت الشغل تاني... انا لو عليا كنت رجعت تاني يوم بس مارضيتش علشان مايقولش اني ماصدقت وها اموت واعرف في ايه



و مع اول فرصة مناسبة للكلام قولتله: خير ايه الموضوع المهم اللي كنت عاوزني فيه

هو: لا هنا في الشغل ماينفعش ...آخر النهار لو ماعندكيش مانع نتكلم في أي مكان قريب من الشغل



انا سكت وماعرفتش ارد ...نخرج فين يعني ..موضوع ايه دا اللي ماينفعش يقولهولي في الشغل ...هايبقي اكتر من انه يتقدمتلي واهو كان في الشغل



هو: انا عارف ان الموضوع محرج بس اوعدك اننا مش هانكمل نص ساعة لو مش عاوزة احنا ممكن نتكلم علي الواقف في أي مكان عادي

انا: لا خلاص في كافية في آخر الشارع اللي احنا فيه عارفه؟

هو: اه عارفه..خلاص يبقي اتفقنا..ها استناكي هناك بعد الشغل



لما وصلت الكافية لاقيته قاعد مستني

قعدت وكنت متوترة جدا بس بحاول اخفي توتري دا

ماعرفش ليه كنت حاسة ان في حاجة كبيرة ..علي العموم ياخبر دلوقتي بفلوس بعد كام دقيقة هايبقي ببلاش



هو: بصي يانغم ساعات مابتعرفيش قيمة الشخص اللي قدامك غير لما بتتعاملي مع شخص غيره....

فاكرة يوم لما جيتلك وقولتلك ان انا مخنوق ومحتاج اتكلم معاكي

انا: اه فاكرة

هو: يومها انا قولتلك ان مفيش سبب معين للخنقة اللي انا فيها ...صح؟

انا: اه صح

هو:اولا الخنقة اللي كنت فيها كانت بسبب ماكنتش من الهوا يعني..كانت بسبب ظروف مادية بمر بيها ..المهم.انتي قولتيلي يومها حاول تدور علي حد تكون بتحبه وتقرب منه وتخليه يساعدك تخرج من اللي انت فيه.... طبعا انتي كنتي تقصدي خطيبتي بس انا لاقتني بقرب منك انتي وبرتاح في الكلام معاكي اكتر مابرتاح في الكلام معاها ...علي فكرة هي بنت كويسة بس مااتفقناش انا وهي فالموضوع انتهي بسرعة

لما اتقدمتلك دا كان بعد تفكير طويل ماكانش قرار متسرع ولا كان علشان اقول لخطيبتي ان اهو الحياة مش واقفة عليكي..ولو حتي كان هو دا السبب ماكنتش هااختارك انتي يانغم واعند بيها مع خطيبتي ...لسبب واحد مفيش غيره...


وبعدين سكت شوية وقالي

انك اطيب وابسط بنت انا قابلتها في حياتي....



حسيت بكلامه دخل جوا قلبي وحستني عاوزة اعيط بس مسكت نفسي بالعافية



كمل كلامه وقالي: ووقفتي جمبي في محنتي من غير ماتعرفي هيا ايه وقفتي جمبي وانا كنت عارف ومتأكد انك بتساعديني وواقفة جمبي بدون مقابل

عارف ان اللي كنت فيه مش محنة بمعني محنة ولا هيا أزمة ومشكلة كبيرة انما برده انتي وقفتي جمبي ...


نغم انا من يوم ماعرفتك وقابلتك وانتي كل حاجة بتعمليهالي وبتقدميهالي حاجة حلوة .... وصدقيني انا مهما عملت عمري ماها اقدر اقدملك نص اللي انتي قدمتهولي ....كفاية اني اتعلمت منك ان الحياة بسيطة جدا وجميلة جدا وماتستاهلش نزعل علشانها

انا عارف انك مستغرباني ومستغربة كلامي بس انتي قولتيلي آخر مرة ان في حاجات لو مااتعاملتش في وقتها ماينفعش تتعمل في وقت تاني

انتي عارفة ان الشركة فتحت فرع جديد لها في تونس وانا كنت مقدم ورقي من زمان علشان اتنقل الفرع دا والموافقة جاتلي من 3 ايام وان شاء الله ها اسافر خلال كام اسبوع ...ومش عارف اذا كنا هانتقابل تاني ولا لآ... دي حاجة في علم الغيب ...انا عارف انك شايلة مني وزعلانة علشان الطريقة اللي اتقدمتلك بيها ....بس صدقيني والله ماكنت اقصد اجرحك ولا ادايقك ..كل ماهنالك اني فعلا ماكنتش محتاج وقت افكر فيكي لأني خلاص عرفت قيمتك وعرفتك كويس بس اكتشفت اني مافكرتش غير في نفسي واعتبرت موافقتك ليا موجودة ومش فاضل بس غير اني اتقدم

انا بصراحة ادايقت جدا من كلامك وقتها ومن رد فعلك بس لما جيتيلي المكتب بعدها...فكرت تاني في كلامك ولاقتني ان زي ما من حقي ادايق منك انتي كمان من حقك تدايقي مني علشان اللي عملته معاكي

ولما جاتلي الموافقة علي قرار نقلي كان لازم اوضحلك وجهة نظري علشان تفضلي فاكراني بالخير ودورت عليكي لاقيت غايبة ...وخوفت ماالحقش اوضحلك أي حاجة واسافر ويكون ساعتها الوقت فات...بغض النظر يانغم سواء النصيب هايجمعنا تاني ببعض او مايجمعناش انتي حد مش عاوز اخسره ويهمني يكون فاكرني بخير ..عاوز لما نتقابل تاني في أي مكان تسلمي عليا وتبتسمي في وشي....



وغصب عني لاقتني بدمع ...هو اخد باله وقالي

انتي بتعيطي ليه دلوقتي؟



مسحت دموعي وقولتله: لا ابدا مابعيطش....حسام

هو: نعم

انا: انا اسفة....اسفة بجد علي سوء ظني بيك ...وسامحني علي كل كلمة قولتها في حقك

هو: لا يا نغم انا اللي آسف علي كل حاجة عملتها وزعلتك مني بقصد او بدون قصد



وبعدين لاقيته بيجيب صندوق متغلف بورق هدايا جمبه من علي الكرسي وبيدهولي

انا: ايه دا؟

هو: الحاجة الحلوة الوحيدة اللي اقدر اردهالك من ضمن الحاجات الكتير الحلوة اللي انتي اديتهالي هي الشيكولاته بالبندق

اخدتها منه وانا فعلا ها اموت واعيط بجد مش قادرة

كمل وقال: اول حاجة بينا كانت حاجة حلوة وآخر حاجة بينا حبيت برده تكون حاجة حلوة وطبعا مالاقيتش غير الشيكولاتة بالبندق...علي فكرة انا قولتلك مرة قبل كدا ان الشيكولاتة اللي اديتهالي احلي حاجة حد ادهالي وبقولهالك للمرة التانية دي فعلا احلي حاجة حلوة حد ادهالي

انا كدا خلصت كل اللي عندي يانغم ومرة تانية سامحيني ان كنت يوم زعلتك اودايقتك.....


انا: والله مسامحاك بس بلاش تحسسني بالذنب اكتر من كدا

هو: علي فكرة يانغم انتي تستاهلي احسن واحد في الدنيا



بس انا مش عاوزة احسن واحد في الدنيا.....ولو حكمت ولازم آخد احسن واحد في الدنيا يبقي هو احسن واحد في الدنيا



وقام من علي الترابيزة وقالي: انا ها امشي بقي ....خلي بالك من نفسك وربنا يوفقك في حياتك

انا: انت كمان خلي بالك من نفسك

هو:حاضر...يلا هاتعوزي حاجة مني قبل ما امشي

انا: لا ربنا يخليك



ومشي ....وانا فضلت قاعدة شوية في الكافية مسهمة وسرحانة ببص علي صندوق الشيكولاتة وساكتة مابتكلمش



لما روحت البيت ....قعدت افتكر كلامه واعيط علي اللي عملته وردود افعالي السيئة للي بوظت بيها الدنيا خالص



قعدت 3 ايام في البيت مابنزلش الشغل ....حاسة ان كل حاجة ملخبطة خالص..بعيد ترتيب حساباتي واوراقي....افتكرت صندوق الشيكولاتة اللي ادهاولي روحت شيلت من عليه ورق الهدايا اللي كان متغلف بيه.. لاقيت الشيكولاته من نقس النوع اللي عزمت عليه بيه في القطر

يااااااااااه لسه فاكر نوعها ايه ...رغم انه مابيحبش الشيكولاتة اصلا ومايفهمش في انواعها



قررت انزل الشغل من بكرة علشان اصلح أي حاجة من الحاجات اللي كسرتها



استنيت آخر اليوم واحنا مروحين ونازلين علي السلم ووروحت سلمت عليه وقولتله: انت كنت قولتلي ان اول حاجة مابينا كانت حاجة حلوة وحبيت تكون آخر حاجة مابينا برده حاجة حلوة واديتني صندوق الشيكولاته صح؟

هو : اه صح

انا: طيب بص بقي...كدا يبقي خلاص

هو:خلاص ايه؟

انا: استني بس...وقومت فاتحة شنطتي


ومطلعة منها شيكولاتة من الصندوق اللي كان ادهولي وقولتله:اتفضل

هو: ايه دا؟

انا: علشان يفضل مابينا حاجة حلوة......


ماحدش عارف الشيكولاتة دي ممكن تعمل ايه معانا بعد كدا



ابتسم واخدها مني وقالي:ماشي يانغم



في الوقت دا كنا وصلنا للطريق استأذنت منه وشاورت لتاكسي ركبت ومشيت وابتسمت وقولت لنفسي: ماحدش عارف بكرة في ايه ....يمكن تجمعنا الدنيا ببعض تاني....وكنت مرتاحة نفسيا ان الحمدلله انا وهو هانفضل فاكرين بعض بالخير




فاتت الايام بعد كدا بسرعة اوي وهو كان سافر خلاص ...

وكان طيفه بيداعبني كل وقت والتاني وكنت كل ما افتكر اللي عملته فيه وكلامي البايخ اللي قولتهوله ادايق جدا بس ارجع اقول رب ضارة نافعة

تمت....................

_________________


انتظرونا في الجزء الثاني بعد رمضان



Sunday, July 25, 2010

(4)..شيكولاته بالبندق


تاني يوم الصبح قابلته علي السلم واحنا طالعين

لاقيته بيقولي: علي فكرة انا سمعت الأعنية امبارح...بجد اغنية جميلة جدا

ابتسمت وقولتله: اهم حاجة تكون جابت نتيجة

قالي: والله يانغم الحمدلله ...حاسس ان الخنقة راحت شوية

انا: ربنا يزيح عنك ..عموما زي ماقولتلك لو حبيت تتكلم انا مستعدة اسمعك



آخر اليوم جه قعد معايا شوية واتكلمنا في مواضيع عامة ....بس اللي كنت مستغرباله فعلا انه ماكانش بيكلمني خالص عن خطيبته ومابيجيبش سيرتها في أي موضوع...ما اعرفش ليه ماكنتش بحس انه خاطب ومرتبط

لا ما اقصدش علشان بيكلمني وبيقرب مني فتكون الاحساس دا عندي ..انه مش مرتبط عيني...انا قولت عادي اقف جمبه في محنته اللي انا ما اعرفش هيا ايه ...وخلاص احنا بقينا اخوات وبنتعامل علي هذا الاساس

عارفة ان موضوع اخوات دا صعب شوية ..قول شويتين بس انا لازم اساعد نفسي علشان اقدر اطلع من اللي حصل بأقل الخساير الممكنة



فضلت الدنيا ماشية علي كدا بتاع كام اسبوع والأمن مستتب والحياة مستقرة وكل شيء علي مايرام

لحد ماجت زميلتي في المكتب وبتقولي: ماعرفتيش اللي حصل؟

انا: خير في ايه؟

هي: مش حسام فركش

انا: ف ايه..؟ فركش.؟!!!...انتي عرفتي ازاي

هي: النهاردا الصبح كان واقف معانا وقالنا

انا: ليه كدا ...ايه اللي حصل

هي: لا ماقالش ...كل اللي قاله مفيش نصيب



انا ساعتها ادايقت ...حتي استغربت نفسي جدا..المفروض كنت افرح يعني صحيح انا خلاص مابقاش في حاجة ناحيته مني بس علي الاقل دا حب قديم واكيد لو دورت هالاقي جوايا رغبة في الرجوع..



ماكنتش عارفة ايه رد الفعل اللي المفروض اخده دلوقتي...هل اروحله المكتب اكلمه ولا استني آخر اليوم ولا اطنش واعمل نفسي ماعرفتش

وانا قاعدة بكلم نفسي واشوف ها اعمل ايه واقوله ايه

لاقيته داخل المكتب وجاي ناحيتي

هو: ازيك يانغم

انا: الحمدلله....صحيح اللي سمعته دا ...انت فركشت

هو: اه ...مفيش نصيب

انا: ليه كدا دا انتوا مابقالكوش مع بعض كام شهر

هو: ما انا قولتلك مفيش نصيب...وبعدين الحاجات دي بتبان علي طول ...يلا حصل خير

انا: ماتزعلش نفسك ان شاء الله ربنا يكرمك

هو:لا ابدا انا مش زعلان ...المهم سيبك من كل دا ....عاوزك تبعتيلي اغنية محمد منير تاني لأن انا فرمت كارت الميموري امبارح ومسحت من عليه كل حاجة

انا: هي الأغنية عاجباك اوي كدا

هو: ماتتصوريش ازاي...لا فعلا فيها شحنة امل وتفاؤل غير عادية




بعتله الاغنية واخدها ومشي.... كان باين عليه شوية انه متأثر رغم انه كان بيتظاهر ان مفيش حاجة ...باين عليه حبها واتعلق بيها...لو دا حصل كان المفروض يعمل المستحيل علشان يتمسك بيها

لاقتني برد علي نفسي واقول: انتي غريبة يانغم بتتكلمي زي مايكون عمرك ما حبتيه قبل كدا ولا نفسك ترجعوا لبعض تاني

اه حبيته بس خلاص مابقاش ينفع نرجع لبعض....هو يخطب يفركش ..يتجوز يطلق ..خلاص خلصنا كل ماهنالك اني بتمناله الخير ...انا جوايا حلو مش وحش حتي لو الشخص عمل فيا حاجة وحشه..وانا خلاص اقنعت نفسي ان انا السبب وانا اللي اتهيألي انه كان بيحبني وعلقت نفسي بيه علي الفاضي




مشيت الأيام بعد كدا مملة موووووووووت مفيش جديد بيحصل

انا بقيت عاقلة ورزينة كدا وبقيت مستبياخاني ..نفسي اعرف العقل دا حط عليا منين...وهو بقي كلامه قليل لو حصل كلام بينا بيكون يا اما اول اليوم يا اما آخر اليوم وخلاص علي كدا



مرة لاقيته داخل عندي المكتب وبيقولي:الله امال باقي الناس فين

قولتله: 2 ماجوش اصلا النهاردا والتالتة عملت اذن ومشيت

هو: دا يبقي من حسن حظي بقي

انا: حسن حظك ازاي

هو: اصل انا بصراحة بقالي كام يوم كدا كنت عاوز اكلمك في موضوع لوحدنا ومش لاقي الفرصة المناسبة

انا : موضوع لوحدنا!!!!!!! خير ان شاء الله

هو: بصي يانغم ...بدون لف ودوران...انا عاوز اتقدملك

انا: ت ايه؟!!!!!!!!!!!!!!!!!

هو: اتقدملك ...ارتبط بيكي يعني

انا: ازاي يعني ...معلش مش واخدة بالي

هو: ايه يانغم ...مش واخدة بالك من ايه بقولك عاوز اتقدملك

رديت عليه بعصبية وقولتله: لا والله دلوقتي بقي ينفع تخطب نغم....وقبل كدا ماكانش ينفع صح؟

هو: لا يانغم مش كدا


انا ولسه النرفزة في كلامي: اقولك انا اشمعني دلوقتي..انت خطبت واحدة وقعدتوا مع بعض فترة وفجأة فركشتوا والله اعلم ايه السبب مش عاوزة اعرف المهم بقي انت عاوز ترد القلم لخطيبتك دي وتقولها اهو الحياة مش واقفة عليكي لو عاوز اخطب ها اخطب من الصبح والف واحدة تتمناني

قومت مدور في دفاترك القديمة مين اللي هاترضي بيا مين اللي هاتواقف عليا مالاقيتش غير نغم...اه دي شكلها بتحبني ...اوعي تكون فاكر اني لما وقفت جمبك في محنتك اني بحبك ...اظن كلامي كان واضح وقولتلك اننا زمايل واخوات....



هو وكان مندهش جدا من كلامي: ايه اللي بتقوليه دا يانغم ....

انا: اللي سمعته...هي دي الحقيقة اللي لازم تواجه بيها نفسك ما انا قدامك من زمان اشمعني دلوقتي فكرت ترتبط بيا

هو: خلاص يا نغم ....انا آسف



وسابني ومشي وانا قعدت واتفتحت في العياط

ايه اللي انتي قولتيه دا يانغم كان ممكن ترفضي وخلاص ....ليه قولتي كدا وليه اتكلمتي بالطريقة دي

يومها مشيت بدري من الشغل ....وعرفت ساعتها واتأكدت اني مانسيتلوش اللي عمله فيا وان حكاية العقل والحكمة اللي نزلت عليا دي كانت حاجة وقتيه لأني لو عاقلة فعلا كنت رفضت وخلاص



انا اول حاجة ها اعملها بكرة اني هااروح واعتذرله علي الكلام البايخ اللي قولته...يعني حتي لو ماحصلش نصيب احب العلاقة مابينا تكون كويسة

انما باللي قولته دا انا عجنت الدنيا خالص

وفعلا اول لما وصلت الشغل روحت علشان اتأسفله


انا: السلام عليكم ...ازيك يا حسام

هو-وكان مصدر الوش الخشب-: وعليكم السلام ...الحمدلله كويس

وسكت ...ايه دا مفيش ازيك يانغم لا دا واضح انه فعلا زعلان مني

مش مشكلة يا نغم خليها عليكي المرادي انتي جاية تعتذري عن حاجة وهاتمشي وبعد كدا هو حر مع نفسه علشان ماتبقيش غلطتي في حاجة

انا: بص انا مش هااعطلك هما كلمتين وها امشي

هو-وكان بيشتغل علي الكمبيوتر ومن غير مايرفع عينه من علي الشاشة-: خير كلمتين ايه اتفضلي قولي انا سامعك

انا: لا والله سامعني ازاي وانت مشغول في حاجة تانية.....انا مش هاآخد من وقتك كتير

هو-التفت ليا -: اوك كدا كويس

وكان بيقولها من تحت الضرس



اللهم طولك ياروح.....اه ماله حق يعمل كدا واكتر من كدا كمان...هو اكيد عارف انا جاية ليه....اه جاية اعتذرله



انا: بخصوص الكلام اللي قولتهولك امبارح...



لاقتني سكت وبقول لنفسي هاتعتذري عن ايه هو مين للي يعتذر لمين

هو ماكفاهوش انه علقني بيه كمان جاي يتقدملي بمنتهي السهولة بعد كام اسبوع من فركشته ..هو فاكر نفسه ايه...لا يستاهل اللي قولتهوله واكتر كمان

هو: ها يا نغم سكتي ليه

انا: انا كنت جاية اقولك علي حاجة كدا بس مش ها اقولها

هو: ليه؟!!!

انا: من غير ليه ...فكرت ولاقيت ان ماينفعش اقولها....مابقاش ينفع اقولك أي حاجة بعد كدا....كل اللي عاوزاك تعرفه ان كل حاجة في الدنيا دي ليها وقت معين تتعمل فيه ولو ما اتعملتش في الوقت دا ماينفعش تتعمل في أي وقت تاني

هو: حاجة ايه ووقت ايه ..انا مش فاهم حاجة

انا: لو حبيت تفهم هاتفهم.. المشكلة عندك انت



وسيبته ومشيت ....انا كنت اقصد انه المفروض كان يتقدم ليا في الوقت اللي كنت بحبه فيه ومتعلقة بيه..انما بعد ماخطب وفركش ارتباطه بيا فقد معناه وفقد فرحتي بيه.....



كنت ها اغلط غلطة عمري لو كنت اعتذرتله مش بس علشان ان انا ماعملتش حاجة غلط اعتذر عليها كل اللي عملته ان اتكلمت بصراحة وقولت اللي جوايا انما كمان علشان كان هايفسر اعتذاري دا اني موافقة علي طلبه وبفتح الطريق له انه يرجع يتقدم تاني وساعتها كان الغرور هاياخده ويفتكر نفسه حاجة وماكانش هايتقدم تاني

بقيت مستغربة نفسي ومستغربة تفكيري وسوء ظني بيه....بس ساعات كنت ارجع واقول هو دا الصح اللي انا عملته وتفكيري فيه مش سوء ظن ولاحاجة ...وان مايستاهلش اعتذاري ليه



يُتبَع.......


Wednesday, July 21, 2010

(3)..شيكولاته بالبندق


بدأت تظهر عليا اعراض الحب ..بقيت بسرح كتير...وبسهر طول الليل افكر وبسمع في اغاني ولو اتفرجت علي فيلم والبطل كان بيقول للبطلة كلام حب تلاقيني اتنهدت

وفي يوم اتصلت بصاحبتي اطمن عليها
ومن ضمن كلام كتير لاقتني بسألها واقولها:هو في الدنيا حاجة اسمها حب؟
قالتلي:اه طبعا يابنتي الحب موجود في كل حاجة حوالينا.. في الافلام العربي والاجنبي والتركي والهندي كمان والمسلسلات والقصص والروايات خصوصا بقي روايات عبير للجيب
انا: بطلي غلاسة ....انا بتكلم بجد
هي: مش مطمنالك يا نغم ...انتي وقعتي ولا ايه
انا:اه شكلي كدا
هي: اوعي يكون اللي في بالي
انا: هو اللي في بالك
هي: طيب احكيلي احكيلي دا انتي نهارك شكله ابيض

وحكيتلها كل حاجة حصلت بينا ....

لاقيتها بتقولي: كل دا كويس اوي ....هو ليه بقي مابيقولهاش صريحة انه بيحبك
انا: ما اعرفش ...يمكن خايف مثلا ما اطلعش بحبه
هي: مفيش حاجة اسمها خايف.....المفروض يحدد موقفه افرضي ان حد اتقدملك وارتبطي بيه...هو مابيفكرش في حاجة زي دي ليه
انا: مايمكن مش جاهز ماديا انه يتقدم
هو: بدال مش جاهز يبقي مايلمحش ومايعلقش الناس بيه
انا: تصدقي بقي ان انتي غلسة فعلا وانا غلطانة اني حكيتلك
هي: يا نغم انا بفكر بالعقل دلوقتي ....انتي علشان متعلقة بيه فالدنيا مش واضحة عندك
انا: يعني اعمل ايه؟
هي: ماتعمليش حاجة ..واسمعيها مني اللي عاوز حاجة بيقولها واللي نفسه في حاجة بيعملها ولو هو زي ما انتي بتقولي بيحبك فعلا يبقي لازم يقولك ومايسبكيش تضيعي من ايديه...
انا:طيب ادعيلي بقي... ماحدش عارف بكرة في ايه
هي: ان شاء الله كل خير...


بصراحة كلام صاحبتي دايقني شوية بس هي عندها حق ..اللي عاوز حاجة بيقولها واللي نفسه في حاجة بيعملها مهما كانت الظروف

بعدها بكام يوم لاقيته جايلي المكتب وبيقولي انتي وراكي حاجة آخر اليوم
قولتله:لا ماوراييش
هو: طيب عاوزك في موضوع مهم آخر اليوم
انا: موضوع ايه؟
هو:ماهو لو ينفع اقولك دلوقتي كنت قولتلك

كانت عينيه بتلمع بالفرحة
وانا قلبي دق وحسيت اني ها اسمع خبر حلو آخر اليوم بس ماكنتش قادرة اصبر

فقولتله:طيب حتي طمني..حاجة حلوة ولا وحشة
هو:لا حلوة اطمني

وفضلت مستنية اليوم يخلص بفارغ الصبر وحسيت ان الساعة بقيت بترجع بالزمن لورا واليوم مش راضي يخلص


علي آخر اليوم جه وقالي: بصي بقي يا ستي اللي ها اقولهولك دلوقتي دا انتي اول حد اقولهوله...علشان انتي ليكي عندي معزة خاصة

دقات قلبي بدأت تزيد
انا: وايه هو دا بقي؟
هو: انا خلاص قررت استقر واكمل نص ديني وارتبط

وجوا الجون جوا الجون جوا الجون....ايوااا كدا هو دا الكلام
والله البت صاحبتي دي دمااااغ وبتفهم ....صح كدا اللي نفسه في حاجة بيقولها وهو دا اللي بيعمله دلوقتي
هو: نغم انتي روحتي فين...
طبعا انا كنت سرحانة فقولتله: معاك معاك ...كمل
هو: عقبالك كدا ان شاء الله انا خطوبتي كمان اسبوعين ....

عينيا زغللت وماكنتش عارفة اتنفس...حاسة ان الأرض بتلف بيا
خطوبته كمان اسبوعين...ازاي يعني...وامتي دا حصل...
حاولت اتماسك قولتله: والله؟!! الف مبروك..
هو: الله يبارك فيكي
انا: علي كدا بقي دي قصة حب قديمة؟
هو: لا ابدا ...دي عروسة رشحتهالي والدتي وقعدت معاها وحصل ارتياح ما بينا فقولت علي خيرة الله

كماااااان ...يعني واحدة مايعرفهاش...ومجرد ان حصل ارتياح فقرر يخطبها ..دا علي كدا بقي المفروض انا وهو نكون متجوزين بدال زي مابيقول ليكي عندي معزة خاصة....طيب والكلام اللي كان بيقولهولي كان اييييييييه.....واغنية "انا شكلي ها احبك " كان يقصدها هيا...امال بيقولي اسمعيها وانتي تفهمي ليه...ها افهمها ازاي يعني

انتبهت علي صوته وهو بيناديني:نغم نغم....ايه يا ابنتي انتي بتروحي فين

انا: ها اروح فين يعني انا معاك اهو....بس بجد الف مبروك
هو: الله يبارك فيكي....علي فكرة ماحدش في الشغل لسه عرف ..انتي اول حد اقوله واعرفه
انا: ربنا يتمملك علي خير.. معلش انا لازم امشي ...ومرة تانية مبروك

روحت البيت وقفلت علي نفسي الأوضة وقعدت أعيط
ازاي ...ازاي يرتبط بواحدة غيري...وانا؟ !!وكلامه ليا ومعاملته وتلميحاته!!!
المشكله اني حبيته فعلا....واستغربت علي الدنيا اللي خلتني اقابل واحد ما اعرفوش وتقربنا من بعض لحد ما احبه وبعد كدا يحب غيري ويرتبط بيها

كنت مخنوقة في اليوم دا جدا.....اول مرة احس بقلبي انكسر ودموعي اللي بكيتها يومها كان ليها طعم الوجع والجرح

كلمت صاحبتي وحكيتلها اللي حصل
قالتلي: ما انا قولتلك يانغم اللي عاوز حاجة بيعملها
انا:صعبان عليا نفسي اوي
هي:وتصعب عليكي نفسك ليه.....انتي احساسك كان بريء و نقي وانتي خبتيه جواكي احمدي ربنا انك ماقولتيش له بحبك
انا: بس اكيد شاف حبي له في عينيا
هو: وحتي لو شاف دا سبب ادعي يخليكي تحمدي ربنا انه انقذك منه...يعني كان عارف انك بتحبيه ومع ذلك تمادي في كلامه وتلميحاته علشان تتعلقي بيه اكتر
بصي يانغم مهما كان اللي حصل انتي برده غلطانة....ماتزعليش من اللي ها اقوله....هو صحيح قال كلام كتير حلو بس دا مش معناه انه بيحبك عادي يعني الشباب بيقولوا اكتر من كدا للبنات علشان يعلقوهم ...وهو ماوعدكيش بحاجة بعينها ....في ناس بتبقي مرتبطة وبتحب ومع ذلك بيغدروا وبيخلوا باللي بيحبوهم...انما في حالتك دي يعتبر مفيش قصة حب من الأساس وعزاءك الوحيد في اللي حصلك ان دي اول تجربة في حياتك واول احتكاك ليكي بالجنس الآخر علشان كدا وقعتي
ان شاء الله يانغم ربنا هايكرمك وماتزعليش والله مافي حد يستاهل دموعك

انا: ها اطلب نقلي لفرع الشركة اللي في وسط البلد
هي: اوعي تعملي كدا....كدا هااتأكديله انك فعلا بتحبيه وانك ياعيني زعلانه انه هايرتبط بواحدة تانية
انا:مش ها اقدر اشوفه ادامي كل يوم وانا عارفة انه مرتبط بغيري ...
هي:بالعكس دا انتي تشوفيه وتكلميه زي الأول وأكتر كمان علشان تثبتيله انكوا زمايل وان الموضوع مفرحك وباسطك
انا:ما افتكرش اني ها اقدر اعمل كدا...صعب جدا عليا
هي:نغم لازم تبقي قوية وتواجهي جرحك وتتغلبي عليه
انا:ادعيلي ...

لما اتكلمت مع صاحبتي ارتاحت شوية وحسيت النقط اتحطت فوق الحروف...اه هي عندها حق ...انا اللي علقت نفسي بيه بدون داعي
هو كان بيعاملني بذوق مش اكتر ...انا اللي فهمت كلامه غلط
الحمدلله حصل خير
يارب اقف جمبي في اللي انا فيه وساعدني انساه وابطل احبه

روحت الشغل تاني يوم وكان اسوء يوم شغل في حياتي....كنت بحاول اتفادي الكلام معاه وعاملة نفسي مطحونة في الشغل...بجد مش قادرة

فاتت الأيام بعد كدا وزمايلنا كلهم عرفوا انه خلاص هايخطب
وبيباركولوا وانا عمالة اراقب الموقف ...هو كان فرحان ومايفرحش ليه ربنا يهنيه ويسعده
ومابقيتش اتعمد اتفادي الكلام معاه لأنه خلاص مابقاش فاضيلي ...في واحدة تانية في حياته دلوقتي....مابقيتش طالباني

اتصلت بيا صاحبتي تشوفني مالي ..لاقيت حالتي النفسية وحشة جدا وقالتلي اقدم علي اجازة واروح اقضي معاها كام يوم عندها في اسكندرية

مافكرتش كتير انا فعلا محتاجة اغير جو وسافرت وحسيت معنوياتي ارتفعت جدا ...
بجد الاصدقاء دول كنز... يعني لو انا لوحدي دلوقتي من غير اصحاب كان زماني مدمرة

رجعت من اسكندرية نغم بتاعة زمان ...اللي بتحب الدنيا والناس

رجعت الشغل وسألت عليه خطب ولا لسه
واحدة زميلتي قالتلي: ان حفلة خطوبته كانت من يومين ..حمدت ربنا اني ماكنتش موجودة وقتها

بدأت اتأقلم علي الوضع واتعامل بشكل طبيعي

ساعات كنت بحس ان خلاص نسيته ونسيت اللي حصل وساعات تانية الاقيني برجع لنقطة الصفر وافكر فيه من تاني ولا كأن أي حاجة حصلت
فضلت علي النظام دا بتاع تقريبا شهر

لحد ما في يوم لاقيته جايلي وبيقولي: نغم انا مخنوق ومدايق ومحتاج اتكلم معاكي شوية

كان باين اصلا علي وشه وباين في صوته وعينيه انه بجد مخنوق

انا : مالك في ايه؟
هو:صدقيني لو قولتلك ما اعرفش...انا بجد زهقت من الدنيا دي وحاسس اني ماليش لازمة ولا ليا هدف في الحياة

انا: كلنا زهقانين من الدنيا مش انت لوحدك...بس الفرق بقي ان كل واحد مننا بيدور علي حاجة كويسة في حياته ويتمسك بيها علشان الحاجة دي تساعده انه يكمل حياته بأمل وحب

طبعا انا كنت اقصد خطيبته...يعني يحاول يتمسك بيها ويحبها وهي دي اللي هاتساعده يتجاوز محنته
وما اعرفش ازاي انا قدرت اعمل حاجة زي دي...حستني فجأة اتحولت لملاك ومش مهم قلبي واللي حصله قد ما مهم انه يقرب من خطيبته ويحاول يتجاوز بيها أي محنة بيمر بيها...لأني عارفة كويس ان وجود شخص بنحبه في حياتنا بيفرق معانا جامد في أي أزمة بنمر بيها

كملت كلامي وقولتله: بص بدال انت ماعندكش سبب واضح للخنقة اللي انت فيها يبقي دا شيطان ..استعيذ بالله وان شاء الله هاتبقي كويس

هو: ونعم بالله
انا: بقولك ايه ...افتح البلوتوث بتاعك ها ابعتلك اغنية حلوة اوي ..دايما اسمعها لما ببقي مخنوقة

هو: اغنية ايه دي
انا: "بحر الحياة" لمحمد منير
هو: لا ما اعرفهاش
انا:اسمعها ومش هاتندم دي اغنية جميلة اوي

وبعتله الاغنية وقالي انه هايسمعها لما يروح البيت وبعدين استأذن وقالي قبل مايمشي: متشكر جدا يا نغم انك سمعتيني


موضوع انه مخنوق بدون سبب دا ما اقتنعتش بيه لأن كان باين عليه فعلا انه شايل حمل او هم..ربنا يفرج عنه

انا: لا ماتقولش كدا...احنا زمايل واخوات ووقت ماتحتاج تتكلم انا موجودة ومستعدة اسمعك

انا قولت خلاص خلينا اخوات احسن ومفيش داعي آخد منه موقف ..الدنيا أبسط من كدا.....ما اعرفش العقل اللي حط عليا مرة واحدة دا جالي منين بس خير خير ...كدا احسن بكتييييير


......يُتبَع