Saturday, October 27, 2007

ياااااااااااارب


حلمك واتكسر جواك وقبلت الوضع
وعرفت ان اللي اتكسر مش هايتصلح ومش ينفع يتصلح
بس لميت الكسر ورميته بعيد
وقولت تحلم من جديد وتعيش من تاني حياتك
وفي حياتك الجديده تكتشف انك فقدت حاجت جميله كانت جواك
حاجات جميله اتكسرت وماعرفتش تلائيلها بديل
حاجات جميله ضاعت
ومش هاترجع غير لما تتحدي نفسك وتتحدي الظروف وتهزم ضعفك وخوفك
و ترجع تاني تعيش مع الناس
وقلبك يملاه يقين انه طول ماهو بينبض لله
ربنا هايفرجها عليها
بس قول ياااااااااااارب

Thursday, October 25, 2007

ليل طويل



قررت مرة تكون وحيد


جربت مرة تعيش حزين


جربت مرة يضيع حلمك منك ويسافر بعيد


حسيت بقلبك مرة تاه وسط زحمة الحياة


وضحكة علي شفايفك شايله ألم وأه


صاحبت جرحك وعاش معاك وعيشت معاه


يبئي انت ودعت نهار جميل واستقبلت ليل طويل

Friday, October 19, 2007

ألم وأمل


جوايا خوف جوايا الم

جوايا حلم وكمان أمل

جوايا شمس وكمان قمر

نفسي أسافر عند النجوم

أطير في السما وأتحدي الهموم

وأجمع ورود من البساتين

وأهديها لكل قلب حزين

Thursday, October 18, 2007

أغنية عجباني

الدنيا دي صغيره
ليها ساعات وايام
ويابخت مين كان ورا
وجابه الزمن أدام
ان كنت في الاول
او كنت في الاخر
مهما الطريق طول
ماهو برده ليه اخر
علي ايه بتحسبها دا الكل هايسيبها
ويتوه وسط الزحام
ويابخت مين كان ورا وجابه الزمن أدام



أغنيه لتامر حسني

Tuesday, October 9, 2007

أروع شخص في حياتك


اوقات كتير بنكون محتاجين حد يسمعنا

يشاركنا حزننا واوجاعنا

حد نفضفضله ونشكيله

حد نرتاحله ونحكيله

عن مشاكلنا وهمومنا

بس مابنلائيش ...بندور كتيير وبننتهي لمفيش

وبنحس اننا وحدنا اصحابنا كتير وحبايبنا ....بس مش فاضينلنا

الشعور بالوحده قاسي ومؤلم خصوصا لما تكون محتاج حد جمبك يسندك حد جمبك يشيل عنك ويسعدك

بس رغم كدا بنتجاوز احزانا والامنا واوهامنا

وبنرجع تاني نعيش اصل الدنيا مش بتقف ولا هاتقف غير بس لما القيامه تقوم

واوقات تانيه بنكون محتاجين نقعد لوحدنا نصالح نفسنا نبعد عن الناس ولو شويه صغيره

بس ما بنعرفش الدنيا زحمة وكلهم حواليك

مش عارف حتي تمشي تبعد وتسيبهم انت المرادي مش عاوزهم ..عاوز حد تاني يشاركك همومك واحزانك

الحد دا جوه في وجدانك

الحد دا هو انت

لما الشعور بالوحده يلح عليك وبقوه والرغبه في اعتزال الحياه والناس هو اقوي احساس

انك تكتشف فجاه انك عيشت مع ناس كتيير وساعدت ناس اكتر واتعرفت علي ناس اكتر واكتر

بس في شخص واحد تجاهلته وبكل الغرور والاهمال عاملته

شخص رائع

طلب كتير انه يقرب منك وانت بتبعد عنه حتي الكلمة الحلوة حرمتها منه

شخص حاول اكتر من مره يقولك "انا اهم واحد في حياتك "

لو عمل حاجه غلط بيئي العقاب هو الحل الوحيد ولو عمل حاجه حلوة يبئي صدفه

ومايستاهلش حتي كلمة برافوالشخص دا هو انت

ولما تقرر انك انت وهو تسافروا لبعيد ...بعيد عن الناس والمشاكل

بس تكتشف انه صعب ..صعب تبعد ..صعب تسافر

لان لسه في ناس بتحبهم وما ينفعش تبعد عنهم لانهم محتاجينلك

تقف قدام نفسك وتبتسم وتقولها "صعب نبعد ..ميعادنا في الاحلام ...ها استناكي كل يوم"

انت اروع شخص في حياتك
--------------------

وداعا



وداعا أيها الحلم الجميل

وداعا في طريق المستحيل

ربما يجمعنا الدهر يوما

في ذلك الزمن البعيد

عندما تغيب الالوان جميعها

وتصبح أنت اللون الوحيد

Monday, October 1, 2007

مشاعر حزينه


جوايا كل مشاعر الدنيا الحزينه

قلبي الصغير اتجرح

والعين بتبكي بئالها ييجي سنين طويله

حلمي اللي كان جوايا وبين ايديا اتسرق

وانا وحدي عايشه في دنيتي ويا مشاعري وأزمتي

واحساس قريب بأني ها اوصل للنهايه

تاهت مني بهجتي وراحت مني ضحكتي

بحلم بيوم ييجي ويكون معاه الهدايه

وترجعلي تاني الابتسامه