Friday, August 29, 2008

حكاية بلوج





قبل الفجر تقريبا بنص ساعة كنت قاعدة علي النت مابعملش حاجه

وبالصدفة البحتة وقع تحت أيدي بلوج

قولت أعمل واحد

رغم أن ماكانش عندي حاجه اتكلم عنها

وحتي لو كان عندي

ظروفي وقتها ماكنتش تسمح أني أكتب أي حاجه

المهم قولت أجرب

سألت نفسي أسمي البلوج ايه

ومافكرتش كتيير أول اسم جه في بالي

قلب حزين

وبعدين لائيتني وانا بكتبه بمسحه وبقول لنفسي

بعد الشر عليكي خلاص حكمتي علي قلبك انه حزين

علشان يعني اللي حصل نقوم نحكم عليه بالحزن

حتي لو هو كدا

مش لازم نستسلم أبدا ليه

وبعدين لو قلبنا بيدق لربنا مفيش حاجه هاتأثر فيه

لو نبض القلب كان لله مش هايدوم الحزن

ومن هنا جه اسم البلوج

قلب ينبض لله

وبعد ما خلصت البلوج والحمد لله بئي جاهز وموجود

أدان الفجرقال

قومت صليت وأنا جوايا شعور بالرضا والراحة مالوش مثيل

مش بس علشان البلوج انما كمان علشان أسم البلوج

رجعت تاني نزلت أول بوست وبالصدفة البحتة كنت كاتباه قبلها بيومين

ماكنتش بزور حد لأني ماكنتش عاوزة حد يزورني مش لسبب غير لأني كنت بكتب ليا ولقلبي

وبحاول أخرج أنا وهو من الألم والحزن اللي كنا فيه

ولائتني مابدونش يومياتي

لائتني بدون مشاعري

كل أحساس يجيلي وأحسه أوي أدونه في بوست

في الأول قبل ما المدونة تتعرف كنت نوعا ما بتكلم بشيء من الوضوح عن مشاعري وأحاسيسي

انما بعد كدا بدأت أدون مشاعري في قصص وحكايات

ممكن
تكون القصة حقيقة

وممكن ماتكونش حقيقة إنما الشعور والإحساس اللي بيجيلك وانت بتقراها حقيقي وبجد

وقلبي حس بيه

أنا ممكن أكون البطلة في بوست ما

وممكن أكون كل الشخصيات اللي في البوست

وممكن ما أكونش أي حاجة في البوست

وفي معظم البوستات بتبئي في حاجه صح حاجة حصلت فعلا والحاجة دي بتبئي مرتبطة بالإحساس اللي بدونه

بس كل بوست بيعبر عني وعن قلبي

ويوم ورا يوم بدأت أدمن التدوين وبئي ليا أصحاب من العالم الجميل دا

أصحاب بيحبوك من غير مايشوفوك ومخلصين في حبهم

ناس ظهروا في الوقت المناسب علشان يقولولي إن الدنيا لسه بخير

علشان كدا أنا بقولهم أنا بحبكوا أوي أوي أوي أوي

أنا ليه بقول الكلام دا

علشان النهاردا

30/8

وزي النهاردا كانت بدايتي في عالم التدوين

سنه مرت علي دخولي أحلي دنيا وأحلي عالم

وكل سنه وكل المدونين بخير وسعادة

ورمضان كريم



Wednesday, August 13, 2008

صندوق اللعب




رغم أنها تقضي بغرفتها معظم أوقاتها



إلا أنها لم تنتبه إلي ذلك الصندوق الذي كان في أحد الأركان



وقعت عينيها عليه وأطالت النظر اليه



وحنين إلي الماضي اجتاح قلبها



اقتربت منه بكل هدوء



وكأنها لاتريد أن يسمع من بالصندوق خطواتها فتزعجهم



فتحته بمنتهي الرفق وكأنها لاتعلم مابداخله رغم أنها تعلم جيدا مابه






صندوق اللعب



الذي احتفظت فيه بكل لعبها وهي طفله



أخرجتهم جميعا ووضعتهم أمامها



تدافعت المشاهد أمامها من شريط زكرياتها



وكأنها تشاهد فيلم مصور في التلفاز



هي بطلته



تزكرت كيف أنها كانت تكلمهم وتحكي لهم يومها بالتفصيل



وأنهم كانوا أول من تحكي لهم الحواديت والقصص التي تكتبها



نعم كانت تأخذ رأيهم



أعادت اللعب مرة أخري للصندوق...



الا لعبة واحدة أحب لعبة لقلبها



عروسة كانت قد أشترتها من مصروفها



أخذتها ونظفتها



في اليوم التالي



أخذتها الي محل هدايا وطلبت منهم أن يلفوا لها هذه العروسة ويعطروها جيدا



ثم عادت للمنزل








وعندما جاء الليل



أخذتها وذهبت بها الي


صديقتها



هم في الأصل جيران قبل أن يكونوا أصدقاء




وقالت لها:



قد تحمل لنا زكرياتنا بعض الألم



لكنها أيضا قد ترسم ابتسامة عريضة علي وجه حاضرنا



عندما كنا أطفالا كنا نلعب سويا ونقضي يومنا سويا



كانت قلوبنا نقيه



يملؤها الحب والجمال



لا تحزني لما ألم بكي



مادام قلبك لم تلوثه الظروف



أهديكي أحب أشيائي وأجمل زكرياتي



علها ترسم ابتسامة عريضة علي وجه حاضرك



ابتسمت صديقتها وعانقتها وقالت لها: سأحافظ علي هذا النقاء وقلبي لن تلوثه الظروف



أعدك بذلك





Sunday, August 10, 2008

تالت تاج





التاج دا جالي من الجميله رانيا

وبعتذر جدا جدا علشان اتأخرت في الرد عليه

تكلم عن نفسك في 10 نقط




النقطة الأولي:مابحبش أتكلم عن نفسي خااااااااااااااالص لأن ببساطة شديدة مابلائيش حاجه أتكلم عنها

اقصد حاجه مميزة يعني ولما بيكون عندي حاجه مميزة برده مابحبش اتكلم عنها غير لما اللي حواليا يتكلموا عنها قبلي ويشوفوها بجد فيا

علشان مايبئاش كلامي في الهوا فربنا يسهل وألائي حاجه أتكلم عنها





النقطة التانيه:أنا شخصية الناس بترتاح في الكلام معاها وبيحكولي كتيير عن مشاكلهم

بيشوفوني عاقلة وبفهم

كل دا كويس بس انا ببئي زي زيهم ماعنديش خبرة ماعنديش تجارب كفاية

بس اللي بندهشله فعلا أني بلائي نفسي بتجاوب معاهم جامد وبعيش وياهم مشكلتهم

لآ وكمان بقولهم كلام حلو أوي ببئي مستغربة أنا ازاي بيطلع مني الكلام دا





النقطة التالته: أنا حد هادي جدا جدا انما لما بزعل أو بدايء بنفعل جامد





النقطة الرابعة:في جوانب في حياتي توب سكريت مابتطلعش لأي حد وممكن ماتطلعش خالص وأنا أوقات كتيير ببئي غامضة للي حواليا وأوقات تانية ببئالهم كتاب مفتوح

ودا يتوقف عليا في بعض الأحيان






النقطة الخامسة:بحب النجاح جدا وأحب نفسي ابئي متميزة في أي حاجه بعملها حتي لو كانت بسيطة وعادية






النقطة السادسة:ممكن أعمل نفس الحاجه كل يوم أنما بمشاعر وأحاسيس مختلفة

نادرا لما بيجيلي ملل لأن بعمل الحاجه بروح جديدة

يعني أيامي كلها بتكون شبه بعضها أنما كل يوم له روح وأحساس مختلف عن غيره






النقطة السابعة: بحب الطبيعة جدا وبدوب فيها دوب ولما ببئي زعلانة بتكفيني نسمة هوا علشان أخرج من مود الزعل وطبعا بعشق القمر والشمس والورد والنجوم والليل والنهار والميه أنا بعشق خلق الله






النقطة الثامنة: برتبط بالأشياء جدا وبتعلق بيهم جامد كفاية أن كان عندي آلة حاسبة أختفت في ظروف غامضة ومالئيتهاش وزعلت جامد أنها ضاعت






النقطة التاسعة:أكتر حاجه بتخنئني في الدنيا هي الجمايل مابحبهاش خاااالص بتكتفني في علاقاتي مع الناس





النقطة العاشرة: ههههههههه بحب الشيكولاته جدا رغم اللي عملته فيا برده بحبها





والمفروض التاج دا أمرره لمدونين بس أعتقد أن كل الناس جاوبت عليه أو كلهم أخدوه

بس الدعوة مفتوحة اللي عاوزه يتفضله وربنا معاه هههههههه