Saturday, October 18, 2008

قسمة عدل




ليه اللي نحبه مابيحبناش
واللي يحبنا مابنحبوش؟


يعني قلبك علشانه دق قلب تاني
جاله لحد عنده يبوحله بحبه
تطلع في عيونه وتقول: يعني هو بيحبني
وبيطلب القرب مني
يعني بيتمناني
وها أكون ليه

رغم أن قلبي مادئش يوم ليه

أصله دق لحد لغيره
بس ياخسارة
دقات قلب الحد دا ماكانتش ليه


تفكر بعقلك وتقول تاخد اللي يحبك
بس يرجع عقلك يقولك
ما أنتوا حالكوا زي بعض

ليه هو يتهنا باللي بيحبه
ويعيش طول عمره جمبه
وأنت الشخص اللي بتحبه يكون لحد تاني؟

ويبئي ردك عليه بالرفض

هي كدا حسبة عقل
وبرده قسمة عدل



Friday, October 3, 2008

هو أنا كنت فين؟



صورة أبيض وأسود وصورة بالألوان

يعني صورة من وقت قريب وصورة من زمان

أشخاص كتير في الصورتين

أمي وأبويا وأختي وأخويا

انما أنا ماكنتش موجودة في الحالتين

سألت

هو أنا كنت فين؟

مالائيتش إجابة منهم

شغلت شريط الزكريات

أدور فيه علي نفسي وقت الصورتين

لائتني في الصورة الأبيض وأسود ماكنتش لسه جيت للحياة

ولما وصلت بئيت لوحدي أنا وقلبي والحزن اللي جواه

وأما راح الحزن منه وأما رجعتله ابتسامته

كان الوقت فات

والمصوراتي مات