Thursday, May 27, 2010

(5)خبر حلو


اتصلت بيها علي الموبايل
دعيت يارب ترد
لا دا واضح اننا اتغيرنا خااااااااااالص ومابئيناش نخاف

الحمدلله ردت

هي: الو
انا: ازيك عاملة ايه؟
هي: لا تمام الحمدلله ...انت اخبارك ايه؟
انا:لااااااا اخباري كويسة جدا جدا
هي: باين من صوتك انك فرحان ومبسوط.... يارب دايما
انا: بصراحة اه و اي انبساط مش عاوز اقولك
هي: طيب ماتفرحنا معاك
انا: دا موضوع طويل ها ابئي احكيهولك بعدين ...المهم انا عاوز منك مساعدة صغيرة كدا
هي: خير..
انا: في الحقيقة ماينفعش في التليفون ...لازم نتقابل
هي: خلاص مفيش مشاكل انا نازلة الشغل الاسبوع الجاي أخلص ورق التأمينات بتاعي
انا: حلو أوي يبئي ميعادنا الأسبوع الجاي ماتتأخريش بئي
هي: لا ان شاء الله مش ها اتأخر عليك
انا: طيب تؤمريني بأي خدمات
هي:متشكرة ربنا يخليك

سلام
سلام

يااااااااااااااه انا طاير من الفرحة
كنت بكلمها بمنتهي الثقة
وافتكرتها وهي بتقولي عاوزة حبك ليا يكون حر ومطلق
يابنت الأيه ..جامدة جامدة
ماهو احساس الحرية اللي بحسه الأيام دي في حبي ليها ماحستوش غير لما اتفجرت جوايا طاقات النور


طبعت ملف الورد اللي كنت بكتب فيه القصة" طاقة نور"
وفاتت الأيام وانا علي وشي ابتسامة مابتفارقنيش
لحد ماجه اليوم اللي قابلتها فيه

كنت قاعد بخلص شغل علي الكمبيوتر في مكتبي
دخلت وسلمت عليا

انا طبعا عاااااااااااادي خااااااااالص ولا كأن كان في أي موضوع بينا

هي: خير مساعدة ايه اللي انت عاوزها مني
انا: في الحقيقة انا بكتب قصة وخلصتها خلاص بس مش عارف احطلها نهاية وكنت عاوزك انتي اللي تحطي النهاية بنفسك
هي باستغراب: قصة؟!!! هو انت اصلا بتكتب قصص انا اول مرة اعرف
انا: ههههههههه لا مابكتبش دي اول مرة بصراحة اكتب فيها قصة وزي ماقولتلك مش عارف اخلصها
هي: وانا اللي ها اخلصهالك؟ اشمعني انا؟
انا: لما تقريها هاتعرفي اشمعني انتي
هي: طيب انت عاوز تكملها ليه ...ايه ناوي تنشرها
قالتها بلهجة تريئه
ضحكت وقولتلها بتريئة برده: لا انتي عارفة انا النشر والحاجات دي مش في بالي
انا مشاغلي كتيير مش فاضي انما دور النشر بتتهافت عليا وماصدئوا اكتب قصة وعاوزين ينشروها قولت مايضرش خدوها انشروها

ضحكت وقالتلي: يا سلاااااااام ....
انا: والله مابهزر هو دا اللي حصل انا نزلت حلقتين منها علي الفيس
هي: مابدخلوش بئالي كتيير
انا: اه ما انا عارف..المهم بعدها لائيت دار نشر بعتالي قالولي انهم عاوزين القصة دي ينشروها وادوني مهلة شهر اخلصها وطبعا انا وافقت
هي: طيب والله الف مبروك ...شكلك طلعت كاتب جامد بئي علي كدا
انا: هاتقري القصة وهاتحددي بنفسك بس ماتتأخريش عليا في النهاية
هي: اوك يناسبك الاسبوع الجاي
انا: موافق

ومشيت ....وكان نفسي تقعد اكتر من كدا بس يلا خلاص فات الكتيير ومابئاش الا القليل

كدا بئي الكورة رجعت تاني ملعبها والمفروض ترد علي حبي ليها

فاتت الأيام ببطء شديد وانا كنت بفكر ياتري هاتكتب النهاية ازاي

اتصلت بيا وقالتلي عاوزة اقابلك بكرة انا ها انزل الشغل ونتكلم
انا استغربت لأن الاسبوع لسه ماخلصش
سألتها: خير في حاجة
هي: لاء ماتقلقش انا بس عاوزاك في موضوع كدا
طبعا ما سألتهاش عن القصة والنهاية لأن واضح فعلا ان في موضوع مهم

تاني يوم كنت قاعد مستنيها بقلق ياتري في ايه

وصلت واول حاجة قولتهالها مالك في حاجة حصلت

ابتسمت وقالتلي انت مالك قلقان ليه ماتخافش مفيش حاجة

قولتلها طيب ينفع ننزل الكافيتيريا نتكلم تحت يكون افضل يعني
هي: وماله ماعنديش مانع
ونزلنا وقعدنا
انا: تشربي ايه؟
هي: لا متشكرة ماتتعبش نفسك
انا بهزار كدا: لاء هاتشربي ..دا امر ها قولي هاتشربي ايه
ابتسمت وقالت: اوك يبئي عصير ليمون
وطلبت 2 ليمون
انا: خير بئي في ايه؟
هي: ثواني .....

وقامت فاتحة شنطتها ومخرجة سكتش رسم واديتهولي

انا: ايه دا
هي: افتحه وانت تعرف
فتحته .....
انا: مش ممكن ...مين اللي رسم الصور دي... انتي؟
هي: اه انا

وانا وعلامات الاندهاش كلها علي وشي مش مصدق نفسي وعمالة اقلب في كراسة الرسم ومش مستوعب اللي انا شايفه

هي كانت رسماني وراسمة ملامح وشي بأكتر من انفعال
بطلت تقليب في الكراسة وقولتلها
من امتي وانتي بترسمي الصور دي

هي: فاكر يوم لما جيتلي وقولتلي ايه مزعلك لما كنت كاتبه علي الفيس عاوزة اسمع خبر حلو
قاطعتها :اه فاكر
هي: يومها فعلا انا كنت مدايئة وزعلانة وعاوزة اسمع خبر حلو انما ماحدش اخد باله اني مدايئة علشان انا ماحبيتش اظهر يعني او ابين دا
لما انت قولتلي كدا انا حسيت احساس اول مرة احسه في حياتي وهو رغبة شديدة في البكاء
ماتخيلتش ان ممكن أي حد في الدنيا ياخد باله اني زعلانة وحسيت ناحيتك احساس كدا ماكنتش عارفة افسره
روحت البيت وفتحت كراسة الرسم بحاول ارسم أي حاجة انفس بيها عن الاحساس اللي جوايا ما انت عارف زي مالكتابة تنفيس الرسم برده
المهم بدون ما اشعر وبدون قصد لائتني برسمك
انا اندهشت وماصدقتش نفسي
بعدها لما اعترفتلي بحبك ليا اتفاجئت زي ماقولتلك ورد فعلي كان حاضر جوايا وهو اني انا مابفكرش في الحب دلوئتي بس منعته ....
روحت البيت وانا جوايا شعور زي ما اكون فرحانة انك بتحبني وجيبت صورتك اللي رسمتها قبلها بيوم وقعدت ابصلها وخلاص من غير ما افكر في أي حاجة
طبعا انا مانزلتش الشغل بعدها لمدة 5 ايام وكان عن قصد مني
كنت عاوزة ابئي لوحدي بعيد عن أي مؤثرات خارجية علشان اعرف افسر الاحساس اللي جوايا
اول درس اتعلمته من التجربة القديمة التأني
وخلال ال5 ايام دول رسمت صورتك كتيير...مرة بتبتسم مرة سرحان مرة منفعل
ولما كنت بنتهي من رسم ملامحك بلائيني مبسوطة
ولما قولتلك دور علي طاقات النور اللي جواك كان لسببين
الأول: وهو انك تتأكد من اللي جواك ناحيتي اذا كان حب فعلا او اعجاب ولو كان حب يكون حر ومن غير قيود
والتاني: وهو اني حسيت جواك حلو أوي انسان طيب ومليان خير و خوفت عليك انك تنجرح من أي حد ماهو بينجرحش اليومين دول غير الناس الطيبين
فلو طاقات النور دي جواك هاتقدر تتغلب علي أي جرح وعملت اجازة مفتوحة علشان الشغل الجديد
علي فكرة مفيش شغل جديد وانا قاعدة في البيت

انا: نعمممممممم ازااااااااااااي ؟!!!!!!


هي: كان لازم اخرج من حياتك علشان تتأكد من اللي جواك وقرارك يكون حر بدون مايتأثر بأي حاجة
انا عارفة انك هاتقولي كان ممكن تفضلي في الشغل عادي ومانتكلمش لحد ما تتأكد من اللي جواك
صدقني انا لو كنت فضلت ادامك حتي لو مفيش كلام عمرك ماكنت هاتعرف تاخد القرار الصح
وكنت واضحة وصريحة معاك من الأول وحكيتلك كل حاجة عني ودا كان معناه حاجة من اتنين يا اخسرك للأبد يااكسبك للأبد
وانا مابئاش ينفع اقبل غير بالمكسب الدايم



انا سكت شوية ورجعت فتحت الكراسة قلبت فيها تاني

وبعدين قولتلها : علي فكرة رسمك حلو أوي ما تأمليش أنك تاخدي السكتش دا تاني
انا صادرته خلاص ها أخده ليا

ابتسمت وماردتش

كملت كلامي وقولتلها:من وسط ناس كتيير اوي بيدخلوا حياتنا ويخرجوا منها ناس قليلة اوي بيسيبوا بصمات جميلة فيها بس ماحصلتش قبل كدا ان حد يسيب بصمة حلوة في حياتك من قبل مايدخلها
وانتي خلتيني ارجع لنفسي ولحياتي ولكل شيء حلو جوايا واحنا لسه ماجمعتناش قصة حب
تعرفي انا علي اد ما بكره الشخص اللي كان في حياتك قبل كدا علشان جرح قلب زي قلبك
علي اد ما انا ممتنله بشكر وعرفان لأنه خرج من حياتك علشان ابئي انا فيها
صدقيني لو قولتلك ان مش بس بحبك بقلبي
لاء دا انا بحبك بعقلي وعيني وروحي وكل حاجة فيا
وبعدين سكت لحظات كدا وقولتلها: تتجوزيني؟

وسادت بينا لحظات صمت

ردت بخجل ووشها احمر: ما سألتش يعني عن نهاية القصة اللي قولتلي أحطها

رديت وانا عارف انها بتوه وبتهرب من السؤال بس كان هروب خجل المرادي

قولتلها: ما انا قولت بلاش احرجك شكلك اصلا لسه ماقريتهاش

هي: لا قريتها وقصة جميلة جدا ماشاء الله عليك اسلوبك حلو في الكتابة

انا: ربنا يخليكي بس بلاش اسلوبك حلو دي اصلها بالعامية فمينفعش تقولي اسلوب


هي: ماشي بالعامية بالعامية ماقولناش حاجة بس بتشد وحوارها شيق
....بس في حاجة ....ممكن تغير العنوان؟


انا: عاوزاني اغيره لأيه؟

هي: "خبر حلو "

ابتسمت وقولتلها: الله عنوان جميل بس ايه هو الخبر الحلو دا

هي وخدودها احمرت اكتر من الأول: الخبر الحلو اني موافقة اتجوزك
وكل اللي حصل من أول ماكلمتك في الموبايل لحد دلوئتي دي نهاية القصة اللي انت طبت مني احطلها نهاية

وفتحت الشنطة وخرجت الورق واديتهولي وقالتلي: اكتب انت بئي النهاية دي بأسلوبك انت

اخدت الورق منها وانا مش مصدق نفسي

وقولتلها : قولي تاني كدا الخبر الحلو ايه اصلي ماكنتش مركز

ضحكت وقالت: يا سلاااااااام....بطل بئي انت سمعت كويس



انا: بجد مش مصدق نفسي....الحمدلله يارب العالمين
ربنا يقدرني واسعدك

هي: ويقدرني انا كمان وأسعدك

ياه أول مرة أشوفها مكسوفة كدا
قمر اوي وهي مكسوفة
طيب بالذمة دي ما احبهاش ازاي
دا لو كانت طلبت مني مليون طاقة نور مش كتيير عليها
ها ادورلها عليهم لحد ما الائيهم كلهم بس ماتضيعش مني ولا تبعد عني



انا: تعالي هنا صحيح ..ايه حكاية جمال مبارك وكريم عبدالعزيز اللي الناس كانوا كاتبينهولك في تعليقاتهم عندك في الفيس

ضحكت وقالت: لا دي حكاية طويلة اوي ها ابئي احكيهالك بعدين.................





الحب دا أجمل حاجة في الدنيا خصوصا لما يكون حر و في الله


.............تمت.........

Wednesday, May 26, 2010

الأموات لا يحاسبهم إلا الله




قالت لها صديقتها: لماذا لم تكتبي موضوعا عن خبر انفصالك عمن كنت تحبيه

ردت: ولماذا أكتب ؟

صديقتها: منذ عهدتك وأنا اعرف أن كلماتك ومدونتك نافذتك التي تطلين منها علي العالم الآخر

وعالمك الخاص الذي تلجئين إليه لتعزفي فيه ألحانك سواء كانت حزينة أو سعيدة

ومنذ أن أنفصلتي عن حبيبك وأنا ازور مدونتك كل يوم

أبحث عن أي شيء كرد فعل لما حصل

فقط تلك الجملة التي كتبتيها مؤخرا تحت أسم المدونة

"كما أعلنتها أمام الجميع دون خجل أني أحببتك أعلنها الآن أمامهم ودون حرج أن حبك قد تسرب من قلبي مثلما يتسرب الماء من بين أيدينا....أنا الآن لا أكرهك ...لا أحتقرك ..أنت لا تثير اشمئزازي ...هكذا هي انفعالاتي تجاه اللاشيء....لاشيء"

اعرف أن ما بينكما كان حبا كبيرا



هي: ما بيننا لم يكن حبا ...بل وهما

صديقتها: حبا أو هما كانت هذه هي التجربة الأولي في حياتك وتوقعت أن تنفعلي لها وتعبري عما بداخلك

هي:انتظرت حتى لا يكون رد فعلي غضبا وأنا لا أحب الغضب لأنه حماقة كما أنني رغم ذلك أقدر مشاعر الغضب ولا أري أن أحدا بهذا العالم يستحق أن أغضب أو أثور لأجله لكني رغم ذلك انتظرت وتريثت حتى يكون كلامي نتاج خبرة واستفادة من هذه التجربة


صديقتها: وها قد مرت أسابيع علي انفصالكما ....وما ستكتبيه حقا سيكون حكيما


ردت علي صديقتها بعد صمت دام بضع لحظات: ماذا لو علمتي أنه مات ....رحل عن الحياة

هل سيكون لرد فعلي معني



ماذا يفيدني إن أعلنت أمام الجميع انه كذابا محترفا وأنه دمية جميلة لا تستطيع الكلام ولا الحركة أقصي ما يمكن أن تفعليه بها أن تقفي أمامها في محل اللعب لتبدي إعجابك بها فتقرري شرائها لتعرفي أن ثمنها باهظ جدا لا يتناسب مع إمكانياتها ورغم ذلك تبتاعيها لتكتشفي بعد ذلك أن ما دفعتيه قد ذهب سدي


ماذا يفيدني إن أخبرتهم أنه يمتلك فراغا بداخله يمكنه من احداث أصوات عالية تلفت الانتباه إليه



ماذا يفيدني أن أخبرت الآخرين أن من كنت أحبه قد عاث فسادا في أرض نفسي وفي جو روحي

وأن برحيله عدت أنا لنفسي

وتفجرت بداخلي طاقات من نور

وعادت لي أشيائي التي كانت تميزني

وابتسامتي الجميلة ارتسمت فوق شفاهي مرة أخري

وحكاياتي الطريفة عدت أقصها علي الآخرين



ماذا سأجني إن اعترفت بجرأة أمام زوار مدونتي انه كان أسوء اختياراتي علي الإطلاق

وأنني قد ضربت بكلام الآخرين عنه عرض الحائط وصدقته



وماذا سأربح أن أخبرت الجميع بأسباب انفصالنا ليسقط من نظر من يعرفه ومن لا يعرفه



ماذا سأربح إن أخبرتهم انه من بين أشياء كثيرة سيئة في حياتي يبقي هو أسوء هذه الأشياء وأنه من بين أحداث كثيرة جميلة في حياتي يبقي رحيله أجمل هذه الأحداث




وما هو المقابل الذي سأحصل عليه إن أعلنتها أمام الجميع أنه ممثل فاشل لأنه لم يتحمل أن يؤدي دور الفضيلة والرجولة فتوقف عن التمثيل ليخبرني أنه قد ضاق ذرعا بما يفعل وانه لربما يختنق بسبب هذه الأدوار



ما هو الطائل من جراء كل هذا إذا كان قد مات وتواري بين التراب



وماذا ستصنع تعليقات من حولي إذا كان قد أنتقل إلي رحمة الله



لا لن أكتب عنه ولن أبكيه ولن أذكره حتى بشر

انه الآن بين يدي الله يحاسبه علي حياته كلها



صديقتها وقد أصابها الدهشة: لكنه لم يمت بعد....


هي: هذا هو رد فعلي تجاهه -عندما كان الرحيل قراره وحده - لم أتصنعه ولم أتكلفه بل جاءني رغما عني


لقد صار بالنسبة لي في عداد الأموات

والأموات لا يحاسبهم إلا الله.



Saturday, May 22, 2010

(4)خبر حلو


رجعت البيت وانا حاسس اني مضروب علي راسي جامد
دخلت انام وقولت لوالدتي ماحدش يصيحني مهما كانت الاسباب
بجد كنت حاسس بصداع فظيييييع
اصلا مافكرتش في أي حاجة حصلت النهاردا ولا أي حاجة من اللي قالتهالي
نمت من العصر كدا وصحيت الساعة 3 بالليل
يااااااااااه انا نمت دا كله بجد ماحسيتش بنفسي
بس قومت وانا حاسس بنشاط والوجع اللي كان في راسي وجسمي اختفي تماما
صليت المغرب والعشا لأنهم فاتوني واقمت الليل
وقعدت اقرا قرآن لحد قبل الفجر كدا ببتاع نص ساعة
خرجت في البلكونة وقعدت شوية
الجو كان تحفة مالوش حل
سيبت نفسي للهوا وكنت حاسس بهدوء وسكينة جوايا

ولائتني بسأل نفسي وأرد علي الأسئله

-هو انت فعلا بتحبها بجد ولا اعجاب بيها وبدنيتها
-لاء طبعا بحبها
-وايه دليلك مايمكن اعجاب بيها وبشخصيتها تعرف منين
-هي برده عندها حق ماتقدرش تنكر ان اختلافها عن باقي البنات شدك ليها وخلاك تتعلق بيها
-يعني لو هي شخص عادي كنت هاتحبها
-بجد مش عارف
-بدال قولت مش عارف يبئي مابتحبهاش
-لاء بحبها

علي فكرة هي ذكية جدا
في الأول انا رميت الكرة في ملعبها وكنت مستني ردها علي حبي ليها
دلوئتي هي اللي رمت الكورة في ملعبي ومستنية ردي عليها

طيب والشخص اللي كانت بتحبه دا ولعب بيها
ازاي يعمل فيها كدا
وحسيت بقلبي وجعني فجأة

وغصب عني اتحول حواري الداخلي اللي كان في صمت الي حوار خارجي
ولائتني بقول الحيوان ...
ضيع من ايده احسن بنت في الدنيا

وحتي لو مش احسن بنت دي انسانة ليها مشاعر واحاسيس
ازاي يعمل كدا

واتخيلت نفسي مكانها واني بحب حد واكتشفت في الآخر انه بيكدب عليا وبيتسلي بيا
اقل رد فعل ليا اني افقد الثقة في اللي حواليا ولو علي الأقل لفترة معينة



قرآن الفجر قال
والجو روعة بجد
سرحت في السما والنجوم اللي كانت مغطياها والقمر اللي كان لسه هلال
ولائتني ببتسم واقول سبحان الله
الكون دا كله بيسبح لربنا ..
سبحان الله وبحمده سبحان الله العظيم


وادن الفجر
نزلت اصلي الفجر جماعة
ورجعت البيت وانا جوايا احساس بالرضا عمري ماحسيته في حياتي قبل كدا
اجمل احساس في الدنيا انك تقرب من ربنا

وقتها بس حسيت هي تقصد ايه بطاقات النور اللي اتفجرت جواها
وخلتها تستعيد ثقتها في الناس وفي الدنيا

الايمان طاقة نور
الخير طاقة نور
الاهل والصحاب طاقة نور
الرضا والأمل طاقة نور
العقل والعلم والعمل طاقات نور
الحياة نفسها طاقة نور

واحساس جديد اول مرة احسه ناحيتها
ان عندها قلب اد الدنيا دي كلها زي عقلها بالظبط

وعرفت طاقات النور اللي اتفجرت جواها من التجربة القديمة
الثقة بالله و الايمان والأمل

اد ايه هي جميلة فعلا ونزلت مني دموعي غصب عني
من شدة احساسي بيها وبجرحها ومن طريقة تعاملها وتكيفها مع اللي حصلها

وأول طاقة نور اتفجرت جوايا النهاردا
الايمان وطاعة الله


رجعت تاني قعدت في البلكونة اسبح بحمد الله
وسألت نفسي تاني
انت بتحبها بجد ولا لآ
مارضيتش ألح علي نفسي في الحصول علي أجابة معينة
وقولت هايبان اذا كان احساسي بيها حب ولا مجرد اعجاب بعد ماتتفجر جوايا باقي طاقات النور

الظلام عمال ينقشع شوية بشوية
وقعدت اتأمل الصبح وهو بيتنفس
سبحان الله علي قدرته ومشيئته

فتحت الكمبيوتر ودخلت النت
فتحت الفيس وطبعا كالعادة فتحت البروفايل بتاعها .........مفيش جديد
هي مابئيتش تدخل زي زمان من يوم ماقولتلها اني بحبها

قفلت النت وفتحت صفحة ورد كنت محتاج اوصف اللحظة اللي انا فيها
وبعدين لائتني بحكي الحكاية من الأول خالص
من اول يوم جت فيه الشغل واتعرفت عليها وشدتني طريقة كلامها وتفكيرها
لحد ما اشتركت علي الفيس وبئيت اتابع اخبارها
فضلت اكتب لحد اللحظة اللي اعترفتلها فيها بحبي
وبعدين الساعة بئيت 8.00 وانا لازم اقوم البس وانزل الشغل


كل زمايلي في الشغل ملاحظين ان وشي منور
وكلامي مختلف واحساسي مختلف
بيقولولي فيك حاجة متغيرة
قولتلهم للأحسن ولا....
قالولي للأحسن طبعا بس في ايه

طبعا احساس الرضا اللي جوايا عمال بيزيد

روحت البيت وقريت اللي كتبته الصبح
ففكرت انزله علي الفيس بوك
عادي يعني كنوع من التغيير مش اكتر
علي فكرة انا ماليش في الكتابة خاااالص
ولما بكون مخنوق من حاجة او بمر بلحظة معينة بكتبها............ بالعامية طبعا
ولما برجع اقراها تاني بحس بعدها براحة

المهم نزلت اللي كتبته وسميت النوت "طاقة نور"
وطبعا لأن القصة ماكنتش خلصت
كتبت في الآخر يتبع........
يعني لسه في باقي للقصة
وعملت تاج لناس كتييير اوي ...رغم اني كنت عارف ان الكل هايقول ان انا بطل القصة بس مش مشكله ها ابئي انكر وخلاص
وابتسمت لما افتكرت جملتها: ان كنت ذا رأي فكن ذا عزيمة

قومت اتغديت وخرجت مع اصحابي شوية ورجعت بالليل فتحت الفيس
لائيت كمية ردود غير طبيعيه والناس كلها متشوقة تعرف باقي الأحداث
انا استغربت لسبب
لأن دا اول نشاط ليا علي الفيس وماتوقعتش ان الكل هايتفاعل معايا كدا
واضح ان التفاعل كان مع القصة مش معايا
دا حتي في ناس ماعملتلهمش تاج وردوا

كدا يبئي لازم اكتب الحلقة التانية
وكتبتها ونزلتها بعد يومين
والردود طبعا بئيت اكتر من الأول
وانا كنت مبسوط اوي

بعد مانزلت الحلقة التانية لائيت رسالة جايالي علي الفيس من جروب انا مشترك فيه بتاع دار نشر يمتلكها مجموعة من الشباب
بتقولي ماانزلش باقي الحلقات علي الفيس وهما عاوزين القصة دي ينشروها عندهم في كتاب بيضم اكتر من عمل لأكتر من كاتب شاب مبتديء
وكانوا سايبين رقم موبايلهم وعاوزني اتصل بيهم

قولت بيني وبين نفسي بس انا مش كاتب
والقصة بالعامية هاتتنشر ازاي

اتصلت بيهم وقالولي اني ابعت القصة علي الميل او اني اجيبهالهم هارد كوبي في مقر دار النشر في جسر الويس

قولتلهم ان القصة لسه ماكملتهاش
ادوني مهلة شهر للأنتهاء من القصة وعرضها عليهم حتي يتم تقييمها ويشوفوا اذا كانوا هاينشروها ولا لآ

سألتهم: هو ايه في القصة يخليها تستحق النشر
قالولي: فكرة الحب نفسها بين الرجل والمرأة بتجذب جمهور عريض من القراء
واحنا بنسعي للتنوع ومراعاة جميع الأذواق والثقافات في الكتاب اللي هايتنشر
مابين شعر وزجل وقصة قصيرة بالفصحي او بالعامية



وبدأت اكتب باقي الحلقات
ولأن القصة في الحقيقة ماكملتش انا ماعرفتش اكملها

بس وانا بكتبها كنت مبسوط جدا وحاسس اني بعمل حاجة مختلفة
ولاحظت حاجة غريبة
المفروض القصة دي بتتكلم عني انا والمفروض برده اني بوصف فيها انفعالاتي واحاسيسي ..كل دا حصل بس كنت في المقابل بتكلم عنها هي اكتر مابتكلم عني
وبسرد في مميزاتها وشخصيتها وجمالها ودنيتها

ولائيت نفسي بقول الحب برده طاقة نور
ايوا علشان بحبها قدرت اكتب قصة انا وهي ابطالها ولائيت استحسان من معظم الناس
انا لو اللي جوايا دا مش حقيقي ازاي قدرت اكتب واوصف احساسي بيها
هي نفسها طاقة نور جوايا
اه صح انا بحبها وحب حقيقي كمان

انا متأكد من اللي جوايا ناحيتها مش محتاج اقعد شهور وسنين علشان اتأكد من حاجة بتكبر جوايا

كدا بئي يبئي لازم اتصل بيها
بس مش علشان اقولها اني طلعت بحبها بجد
الكورة من الأول وهي في ملعبها
ودلوئتي الكورة في ملعبي

ابتسمت لنفسي وقولت: الكورة لازم ترجع ملعبها تاني

وآدي كمان طاقة نور اتفجرت جوايا
وهي ثقتي بنفسي

يتبع...............

Wednesday, May 19, 2010

(3)خبر حلو




مابين تردد اني أتصل بيها أو ما اتصلش
قررت اني اتصل
عادي يعني كأني بباركلها علي الشغل الجديد وها اقفل معاها علي طول

طلبت الرقم وسمعت الجرس ودقات قلبي زادت وفضلت ادعي ربنا ماتردش
انا ايه اللي خلاني اتصل بس
يادي الجبن اللي انا فيه
ماتهدي يا ابني شوية في ايه هو انت بتتصل بوزارة الداخلية

وبعدين ردت

هي : الو

انا: السلام عليكم ازيك عاملة ايه

هي: الحمدلله كويسة اخبارك انت ايه

يااااااااااااااااااه صوتها كان واحشني بشكل

انا: تمام الحمدلله
الف مبروك علي الشغل الجديد

هي: اه الله يبارك فيك
دا شغل مؤقت تغيير جو يعني

انا: ربنا يكرمك ويوفقك
وعلي كدا بئي انتي مبسوطة ومرتاحة في الشغل الجديد

هي: ربنا يقدم اللي فيه الخير

وما اعرفش ليه حسيت بصوتها مش طبيعي

انا: مالك انتي في حاجة مزعلاكي

هي ضحكت ضحكة خفيفة كدا وقالت: انت ليه مصمم دايما ان في حاجة مزعلاني

انا: مش عارف بس بحس دا في كلامك وصوتك

اتنهدت وقالت: لا انا كويسة ماتخافش عليا

انا: علي فكرة انا عاوزك تنسي أي حاجة قولتهالك بخصوص اني بحبك وكدا لأن واضح ان الموضوع مسببلك حرج وعلي أساسه فضلتي تسيبي الشغل

هي: ايه اللي انت بتقوله دا....انت متأكد انك بتحبني
ومستعد تعمل المستحيل علشاني

انا : اه طبعا بحبك وجدا كمان وبكرة الأيام تثبيتلك

هي: انت مع اول جولة فضلت الاستسلام والانسحاب علشان اتأخرت عليك في الرد
انا ليه حاساك خايف.......ما انا قولتلك ان كنت ذا رأي عارف تكملة باقي المقولة ولا اكملهالك

كانت بتتكلم بلهجة رزينة شوية

لائتني انفعلت وقولتلها: لاء انا مش خايف انما خايف علي قلبي من انه ينجرح منك وتتجاهليه انتي متخيلة يعني ايه حد يحب حد ويبئي نفسه يطلع هو كمان بيحبه والحد دا مش مقدر حبه ليه وعمال يقوله ايه فيك مميز وخرج طاقات النور اللي جواك...بصي اصلك مش هاتحسي باللي انا فيه علشان شكلك ماحبتيش قبل كدا
وطبعا انتي بتتقلي عليا علشان تضمني اني افضل احبك

هي ونبرة صوتها فيها عتاب: انت شايف كدا
علي العموم متشكرة علي كلامك
ربنا يوفقك ويكرمك

سلام
سلام

قفلت معاها وانا جوايا ستين واحد بيهزأوني وبيشتموني
ايه اللي انا قولته دا
انا عجنت في الكلام
دا اللي ها اتصل اباركلها وبسسسسسسسسسسس

اديني جيت اكحلها عميتها

هايجرالي حاجة من كتر تأنيب الضمير
ماجاليش نوم يومها ومانزلتش الشغل

وفضلت قاعد في البيت
قاعد وخلاص عمال افكر في مكالمة امبارح

وقولت كدا خلاص هي مش ها تتصل تاني ولا هاتكلمني

وحتي لو انا اتصلت واعتذرت انا عارفها كويس هاتقولي
لا ابدا ماحصلش حاجة انا مازعلتش منك

هي اصلها كدا تبئي زعلانة من حد او زعلانة من حاجة ومايبانش عليها



بالليل وقبل ما انام
لائيتها باعتالي رسالة علي الموبايل

"انا بكرة ها انزل الشغل اخلص شوية اوراق عاوزة اقابلك علشان عندي ليك كلام مهم"

وفرحت اوي لما شوفت الرسالة
وفكرت ياتري عاوزاني ليه وعاوزة تقولي ايه
بصراحة ما اديتش فرصة لدماغي تودي وتجيب ونمت
علشان ابئي فايق تاني يوم


قابلتها تاني يوم في الشغل في مكتبي
ابتسمت وسلمت عليا ولا كأني قولتلها أي حاجة في الموبايل
ولا كأنها زعلانة ولا جاية تعاتبني


انا: مش عاوزك تزعلي من كلامي معاكي امبارح
غصب عني والله انتي لو تعرفي بحبك اد ايه هاتقدري انفعالي

هي: بص انت لما قولتلي انك بتحبني بصراحة انا ماكنتش متوقعة دا منك
وكان ردي جاهز عليك لحظة ما اعترفتلي بحبك وهو ان انا مابفكرش في الموضوع دا دلوئتي
انما انا شوفت حبك ليا في عينيك وحسيت حاجة غريبة جوايا بتقولي استني شوية مايبئاش دا ردك

لما جيتلك تاني يوم وسألتك ايه فيك مميز يخليني احبك ماكانش قصدي احرجك او اهينك بالعكس انا كنت عاوزة الفت انتباهك للمميزاتك ولأمكانياتك علشان حبك ليا يبئي حب حر ومطلق ومايبئاش بتحبني علشان انا فيا كذا وكذا والطبيعي انك تحبني

انا كنت عاوزاك تتأكد من اللي جواك ناحيتي
اعجاب بالدنيا بتاعتي وبعقلي وشخصيتي وتفكيري ولا حب حقيقي بيا كأنسانة ليها قلب وأحساس


انت قولتلي في الموبايل اني مش مقدرة اللي انت فيه علشان ماجربتش الحب قبل كدا
علي فكرة انا حبيت قبل كدا واتجرحت كمان

انا بدهشة واستغراب: حبيتي؟!!!!!!!!
امتي دا؟

هي: دي تفاصيل ها تعرفها بعدين بس اسمعني للآخر
وسكتت شوية واتنهدت وبعدين واصلت كلامها وقالت:
عارف الشخص اللي انا كنت بحبه دا كان مبهور بعقلي ودماغي وكلامي
وقالي كتير انه بيحبني وهايموت لو ضيعت منه وعيشت معاه ايام جميلة
بس طلع حبه ليا في الآخر رهان ....كان متراهن عليا مع اصحابه انه هايخليني اقع في حبه وابقي زي الخاتم في اصباعه عارف يعني ايه تعيش عمرك كله مستني اللحظة اللي تقابل فيها حد يحبك ويخاف عليك
ويوم ماتيجي اللحظة دي تكتشف في النهاية انه كل كدب ونصب ومشاعرك واحاسيسك مالهاش قيمة ولا تمن
طبعا قلبي اتجرح وعيشت ايام صعبة ....بس عارف الأيام دي ماطولتش
وقدرت اتجاوز المحنة دي في وقت قياسي 7 ايام رغم ان حبي ليه يستاهل انه يتنسي في سنين بس دا ماحصلش......
عارف ليه؟
علشان انا اتفجرت جوايا طاقات نور كتيير قدرت من خلالها اتجاوز جرحي ووجعي
وربنا وقف جمبي وساعدني ارجع لنفسي وناس كتيير كانوا بعيد عني رجعوا تاني لحياتي ووقفوا جمبي
وصدقني لو قولتلك ان فرحتي بالناس دي خلتني ما افكرش في أي حاجة حصلتلي


تصور بئي لو ربنا ماكانش وقف جمبي وماكنتش اتفجرت جوايا طاقات النور دي
كان زماني بئيت ازاي.....طبعا عبارة عن حطام ببكي طول الوقت

انت بتسأل نفسك دلوئتي لما هو الوضع كدا ليه كنت ها ارد عليك واقولك مابفكرش في الحب دلوئتي
المفروض اني نسيته وانا فعلا نسيته وصدقني لو قولتلك لا بحبه ولا بكرهه
واني بحمد ربنا كل يوم انه خلصني منه وبعده عن حياتي


انا قولتلك كدا علشان انا ماكنتش عاوزة اظلمك معايا وابئي بعوض بيك اللي حصلي زمان
علي فكرة انا اللي حصلي ما افقدنيش الثقة في اللي حواليا
وعارفة ان ربنا هايعوضني بحد كويس يحبني بجد


انا مش عاوزة يحصلك نفس اللي حصلي
علشان كدا قولتلك طلع طاقات النور اللي جواك
علشان يوم ماتنجرح من أي حد انا او غيري
تقدر تتجاوز اللي يحصلك وتكون اقوي من الناس والظروف

انا اللي حكيتهولك دا اول مرة احكيه
وقولتهولك علشان حسيتك بتحبني بجد
بس زي ماقولتلك ممكن يطلع حبك دا اعجاب بيا وبعقلي وبتفكيري
علشان كدا خد وقتك ودور علي نفسك
صدقني هاتلاقي احسن واحد في الدنيا
بعدها ارجع اسأل قلبك تاني لسه بيحبني ولا لآء
ولو لسه بيحبني انت عارف هاتوصلي ازاي رقم موبايلي معاك وساعتها ها ابئي اسعد انسانة في الدنيا
ولو لآ ثق تماما اني عمري ماها ازعل منك وهانفضل اصدقاء لأن اللي جواك دا كان هاينتهي في يوم من الأيام

ولحد مادا يحصل انا مش ها ابئي موجودة في حياتك

كلامها وجعني اوي وزي مايكون نزل عليا سهم الله
وماكنتش عارف ارد عليها
انا متفاجيء باللي قالته...

هي : ايه مالك مابتتكلمش ليه
انا: لا ابدا انا معاكي بحاول استوعب اللي قولتيه
هي: ماتزعلش مني... انا بجد اسفة
انا: لالالالا ماتتأسفيش ارجوكي
هي: ربنا يوفقك في حياتك ويرزقك بأحلي حاجة في الدينا
اسيبك انا دلوئتي هاتعوز مني حاجة قبل ما امشي

انا: لا شكرا

وسابتني ومشيت
وانا هناااااااااااك في دنيا غير الدنيا
مش قادر استوعب اللي قالته

حبيت قبل كدا واتجرحت؟!!!


يتبع..............


Sunday, May 16, 2010

(2) خبر حلو



الحمدلله النهاردا هي رجعت الشغل بعد غياب 5 ايام
بصراحة اتشاهدت بس ما اعرفش ليه خوفت وقلبي انقبض
انا عاوز اعرف ردها علي اللي قولتهولها
طيب اروح اكلمها اطمن عليها واعرف منها
ولا بلاش احراج ليا وليها وهي لو كدا هاتيجي تقولي

قعدت في مكتبي سرحان وشارد الذهن ....
قلقان اوي زي ما اكون في ثانوية عامة ومستني النتيجة وخايف ما اجيبش مجموع يدخلني الكلية اللي بحلم بيها

وبعدين لائيتها جايالي المكتب
وبتبتسم وبتقولي: ايه ماجيتش تطمن عليا يعني دا انا مانزلتش الشغل بئالي 5 ايام

انا بتوتر: انا كنت لسه ها اجيلك حالا

هي: لا خلاص بعد ايه بئي انا جيتلك اهو لحد عندك ... ممكن اسألك سؤال

انا: اتفضلي

هي:انت ليه بتحبني؟

انا: انتي ماينفعش ماتتحبيش رقيقة وجميلة ومحترمة و....

هي بتقاطعني: كويس طيب تفتكر ايه فيك مميز يخليني احبك

استغربت السؤال وقولتلها: مش شايفة فيا حاجة حلوة تخليكي تحبيني وبعدين اللي بيحب مابيدورش علي الأسباب

هي: ما انت حبتني علشان انا فيا حاجات كتيير مش في البنات

انا : لا انا علشان بحبك شوفتك غير كل البنات

هي: لاء علشان انا عارفة حدودي وامكانياتي وبتصرف علي اساسها انت حستني مختلفة واعجبت بيا وبعدين حبتني فظهرتلك باقي مميزاتي

انا: لو حبتيني هاتكتشفي فيا حاجات كتيير حلوة

هي: لاء انت اللي لازم تقولي ايه فيك مميز يخليني احبك

انا: مفيش داعي للأحراج أكتر من كدا كان ممكن تعتذري وتقولي خلينا اصدقاء احسن من الكلام والمبررات اللي بتقوليها دي

واستأذنت منها ومشيت وانا حاسس بخيبة امل بالظبط زي ماتكون نتيجة الثانوية العامة ظهرت وانا جيبت مجموع أي كلام


روحت البيت وقعدت بيني وبين نفسي
ولائتني بفكر في السؤال اللي سألتهولي
انا فيا ايه مميز يخليها تحبني
اه انا انسان عادي جدا زي ناس كتير ماليين الدنيا
تحبني ليه وبتاع ايه ..... ايوا صح كدا
ما انا مارضيتش اعترفلها من الأول علشان انا عارف نفسي كويس

الدنيا بدأت تسود في عيني
واليأس اتمكن مني

تاني يوم في الشغل
لائيتها جاية تقولي: لو دورت جوا نفسك هاتلاقي طاقات نور كتيير
طلعها من جواك واستغلها علشان ماتنطفيش

انا: متشكر علي نصيحتك وعلي فكرة اعتبريني ماقولتش أي حاجة وزي ما احنا زمايل وبس

هي: لما تطلع طاقات النور اللي جواك نبقي نتكلم في موضوع الزمايل دا

و سابتني ومشيت

ما اعرفش ليه حسيت ببصيص امل ونور من كلامها
حسيت انها بتلمحلي بطريق غير مباشر ان هو دا شرطها علشان توافق علي الارتباط بيا


علي فكرة انا مش بس بحبها انا بعشقها
خايف حبي يفضل من طرف واحد
وتكون هيا بتتفلسف عليا علشان تهرب بزوق من حبي ليها
بس لاء هي واضحة ومباشرة ولو مابتحبنيش هاتقولي كدا في وشي
امال في ايه .... انا بجد تعبت


وبدأت أدور جوايا علي طاقة نور اقدر من خلالها اوصل لقلبها

وحسيت اني زي ما اكون وقعت في حب الأميرة بنت الملك وان انا من عامة الشعب غلبان وعلي ادي وروحت للملك اطلب ايدها فشرط عليا ان مهرها ما اعرفش يكون اناء مسحور موجود ما اعرفش فين واني لازم اجيبهولها في فترة معينة

بصراحة هي فعلا اميرة
بحس انها جاية من عالم الأحلام ...... سندريلا وسنووايت واليس
عارفين ايه كمان بيشدني ليها
ان رغم عقلها وحكمتها وهدوئها
هي مرحة وخفيفة الظل وشقية ومجنونة
بجد بشوف فيها الدنيا بحالها

الموضوع بالنسبالي بئي صعب
ياريتها كانت طلبت مني مهر مليون دولار
كان هايبئي اسهل بكتيير من اللي انا فيه


تاني يوم روحت الشغل وسألت عليها قالولي دي قدمت علي اجازة مفتوحة
سألت ليه
قالولي جالها شغل في شركة متخصصة في بناء الكباري والطرق السريعة
وهاتشتغل في العلاقات العامة
لفت الدنيا بيا وضربات قلبي زادت وحسيت بدموعي بتترجاني تنزل


اه علشان كدا قالتلي دور علي طاقة نور جواك
علشان لما تبعد عني اقدر انساها


وفاتت ايام كتيير
واخبارها بتقل يوم ورا التاني
وهي مابقيتش تدخل الفيس كتيير زي زمان
كل فين وفين تدخل ترد علي حد من اصحابها
الردود العادية اللي لا بتودي ولا بتجيب
زي
Nice photo
Good work
I adore this song

لحد مافمرة دخلت الفيس لائيتها كاتبة استاتس

هي الحياة كدا ليه بئي ليها لون تاني بئي ليها طعم جديد ولا كان علي بالي

اندهشت جدا من الاستاتس وماكنتش عارف هي تقصد ايه
تقصدني انا وتقصد اعترافي بحبي ليها ولا تقصد حاجة تانية خااااالص
ومابئيتش عارف افرح ولا ازعل
هو المفروض الاغنية دي تقول انها فرحانة
بس ثواني هي ساعات ممكن تكتب حاجة لها معنيين
معني قريب ومعني بعيد وفي الغالب هي بترمي للمعني البعيد
يعني الستاتس اللي كاتباها دي بتقول ان حياتها بئي ليها طعم جديد بس هي ماقالتش الطعم الجديد دا حلو ولا وحش
وما اعرفش ليه جالي احساس انها تقصد الطعم الوحش
يادي احساسي دا اللي شغال ليل ويا نهار مابيرساش بيا علي بر

اه هي غامضة ...غامضة اوي كمان
ما اعرفش انا وحدي اللي بقول كدا ولا الكل
طيب اتصل بيها علي الموبايل اكلمها اشوف في ايه
لاء مش ها اتصل
اتصل اقولها ايه وبعدين هي لسه مارديتش عليا وسابت الشغل من غير ماتعرفني
وقالتلي خرج طاقة النور اللي جواك
مش لما اعرف ايه طاقة النور اللي جوايا ابئي اخرجها


ياتري ايه طاقة النور اللي جوايا؟


يتبع.............


Thursday, May 13, 2010

خبر حلو




كالعادة أول ماصحيت من النوم دخلت علي النت
وفتحت صفحة الفيس بوك
رغم اني مش من مدمنين الفيس
انما علشان افتح البروفايل بتاعها واقدر اتابعها
ماكانش ليا في الفيس بوك خالص
بس مرة كنا طالعين رحلة مع الشغل
وقاعدين بنحكي
صاحبتها قالتلها ارحمي نفسك شوية انتي زي ماتكوني اتجوزتي النت وخصوصا الفيس بوك
سألتها: هو الموقع دا مفيد اوي كدا
ردت صاحبتها بدال منها وقالت: ولا مفيد ولا حاجة دا مضيعة للوقت
بصراحة ما اقتنعتش لأنها انسانة مثقفة ومفيش حاجة بتعملها بدون مابتكون مقتنعة بيها
علشان كدا سألتها تاني: ايه اللي بيخليكي بتحبي الموقع دا كدا
قالت: ان الموقع نافذه بتخليها تعرف اخبار كل اصحابها وكمان اخبار الدنيا كلها
وفي جروبات دينيه وثقافية وترفيهية وهي بتستفيد جدا منه وبتعرف تتواصل وتكون صداقات مع ناس كتيير وفنانين ومشاهير وصحفيين وكتاب ونقاد
وأحلي حاجة بتحبها في الفيس وشايفاها شيء رائع
الستاتس اللي بتكتب فيها جمل ومقولات بتعبر عنها

هي قالتلي كدا بالنص: كلا منا يعزف علي أوتار نفسه ليراه ويسمعه الآخرون والموقع دا بيسمحلي اعزف ألحاني بمنتهي الحرية

قولت بيني وبين نفسي صح كدا هي دي شخصيتها

واول لما روحت عملت اكونت واشتركت علي الفيس
وبعتلها دعوة اضافة

وبدأت اتابعها بشغف زي ماتكون نجمتي المفضلة اللي بتابع اخبارها في المجلات والتليفزيون

هي نشيطة جدا علي الفيس بتكتب تدوينات وبتنزل فيديوهات وبتستعمل تطبيقات كتيير
وعندها مايقرب من 200 صديق ومعظمهم يتواصل معاها

بس انا ماكنتش بكتبلها كومنتات
انا بس كنت بتابعها واتابع اخبارها

وحافظ البروفايل بتاعها اكتر ماهي حافظاها وبدخله في اليوم اكتر من مرة

لحد ماصحيت النهاردا الفيس ولائيتها كاتبة في الستاتس بتاعها

عاوزة اسمع خبر حلو ممكن؟

ولائيت عندها بتاع 30 كومنت
مابين هايعينوكي رئيس الجمهورية
ومبروك كسبتي معانا مليون دولار
وكريم عبدالعزيز معجب بيكي
وجمال مبارك نفسه يقابلك

التعليقات كانت معظمها طريفة وهزار
بس ما اعرفش ليه ساعتها حسيت ان في حاجة مزعلاها
وهي عاوزة تسمع خبر حلو علشان تخرج من مود الزعل اللي هيا فيه
انا احساسي بيها مابيخونيش
انا حافظاها اكتر من نفسها
هو دا اسلوبها في التعامل مع الألم والوجع انها تدور علي حاجة حلوة تبسطها
بس لاء كونها تطلب انها تسمع خبر حلو من اللي حواليها دا معناه انها مش عارفة تخرج نفسها من اللي هيا فيه فلجأت للآخرين وهي نادرا مابتلجأ ليهم

كمان شد انتباهي حاجة انها ماعقبتش علي الكومنتات
رغم انها بتعقب دايما وبا استمرار
قلقلت اكتر عليها وماكنتش عارف اعمل ايه

قابلتها في الشغل ولائيتها بتضحك وبتبتسم وبتهزر عادي
بس لاء مش معني انها بتبتسم انها سعيدة

روحت كلمتها وقولتلها مالك ايه مزعلك
ابتسمت بدهشة وقالت لاء مش زعلانة ليه بتقول كدا
قلت:اصلك عاوزة تسمعي خبر حلو
- ودا معناه اني زعلانة لا خالص ...ثواني ورن هاتفها المحمول واستأذنت منها ومشيت


وأحساسي ان في حاجة مزعلاها زاد جوايا

بس انا عندي مشكلة كبيرة جدا يمكن اكبر مشكلة في حياتي
اني بحبها ومش عارف اقولها
بصراحة بخاف تعرف وماتطلعش بتحبني
وتبعد عني ساعتها ابئي ضيعت
اصلي بحبها بجنون
هي غير كل البنات اللي انا عرفتهم
بنت جميلة وواثقة من نفسها محترمة وعندها زوق
كمان حكاياتها مابتخلصش والكلام معاها ممتع بياخدك لحد السما
كمان ابتسامتها صادقة ومشرقة
بحس وانا معاها اني احسن واحد في الدنيا
الكل بيحبها وبيتمني قربها
ملامحها بسيطة جدا وهادية شيء يبعث في نفسك الراحة والسكينة
غير متكلفة في لبسها واناقتها

بس المرادي جالي نداء من جوايا
بيقولي قولها انك بتحبها
وحسيت ان هو دا ممكن يكون خبر حلو بالنسبالها
وتنسي معاه أي حاجة مزعلاها
انا فاكر مرة زمان قالتلي
انت حد كويس وطيب وتستاهل كل خير
فممكن لو عرفت اني بحبها تحبني ايه يمنع
لاء في حاجة تمنع
هي دنيتها واسعة وكبيرة انسانة جريئة ومتفتحة
انما انا جمبها بحس ان دنيتي ضيقة ومش ها اعرف احتويها

تاني يوم اتقابلنا في البريك
لائيتها جاية تقولي
انت ايه خلاك تقول امبارح اني زعلانة من حاجة
انا: مش عارف حسيت انك زعلانة لما كتبتي علي الفيس انك عاوزة تسمعي خبر حلو
هي: تفتكر ايه احلي حاجة في الدنيا
انا: وعلي طول الحب
ابتسمت وقالتلي يابختك شكلك بتحب وواقع
انا: ويابختي ليه دا حب من طرف واحد هي ماتعرفش
هي: ليه مابتعرفهاش
انا: بصراحة خايف
هي: ان كنت ذا رأي فكن ذا عزيمة فاهمني؟
انا: بس اخاف تطلع مابتحبنيش
هي: لو طلعت مابتحبكش يبئي ماخسرتش كتيير انما لو ماقولتلهاش وطلعت بتحبك ومستنياك تتكلم ساعتها هاتكون خسرت فرصة عمرك

انا : انتي شايفة كدا
هي : جرب ومش هاتندم
انا: طيب ممكن اسألك سؤال بدون حرج يعني
هي: لا خالص اتفضل
انا: عمرك ماحبيتي قبل كدا
ابتسمت واحمرت خدودها وقالتلي انا لازم امشي دلوئتي
نكمل كلامنا بعدين

كلامها اداني دفعة وجرأة اني اعترفلها في اقرب فرصة

بصراحة حسيت من كلامها انها ممكن تكون بتحبني
يارب تطلع بتحبني
او تقبل حبي
لو دا حصل انا ها ابئي اسعد انسان في الدنيا

وفات اسبوع وانا عمال افكر ازاي اقولها اني بحبها
ازاي
حد يقولي ازاي


قابلتها وقولتلها عاوزك في استشارة
ضحكت وقالت خير
انا: انا مش عارف اصارح البنت اللي بحبها ازاي بحبي
هي: بسيطة ..كلمها وقولها وش كدا بحبك
البنات بيحبوا الشاب الجريء

انا: طيب حيث كدا بئي انا بحبك

هي باستغراب : بتحبني انا؟
ازاي

انا : اه بحبك ومش عاوز ردك دلوئتي خدي وقتك وابئي ردي عليا
بس عاوزك تعرفي لو قولتي اه انا ها ابئي ساعتها ملكت الكون دا كله

وسيبتها ومشيت وكل شوية ابص علي الموبايل مستني رسالة منها
مفيش أي حاجة
تاني يوم في الشغل سألت عليها قالولي غايبة
تالت يوم ولحد خامس يوم
وانا اليأس اتمكن مني بصورة بشعة
مابئيتش تظهر علي الفيس ولا تكتب ولا أي حاجة
طيب وبعدين
الحكاية هاتخلص علي كدا ولا ايه
لا ماينفعش ايه اللي انا عملته دا
ماهي كانت ادامي وكنت راضي
اجيبها منين دلوئتي

...........يتبع

Saturday, May 1, 2010

سادس تاج




بئالي كتيير جدا ما نزلتش تاج وكان عندي تيجان كتيير بس ما اعرفش ضاعت مني فضلت ادور وانقب وابحث علي أي تاج في أي مدونة ملائيتش قولت هو في ايه الناس اعتزلت التاجات ولا ايه لحد ما ربنا هداني ولائيت التاج دا في مدونة "ولو" وبصراحة عجبني



حاجات نفسي أعملها


أتعلم فنون الكتابة وامتلك أدواتي في المجال دا

أتمشي علي البحر وقت الغروب

ربنا يكرمني ويوفقني وأناقش الماجستير



حاجات باعرف اعملها/بحب اعمله


بحب القراية جدا

بحب الكتابة والتدوين

بعرف أتحاور وأتناقش

اقعد لوحدي انسج حكايات وقصص وروايات

بعرف اقف جمب قلبي ونفسي لما يبئوا في أزمة وبصراحة حاجة زي دي لسه متعلماها قريب ودا بفضل الله طبعا



حاجات مش بعرف أعملها


الرسم

الغنا




حاجات بقولهم كل يوم


وانا خارجة من البيت بقول:بسم الله توكلت علي الله ولاحول ولا قوة الا بالله العلي العظيم اللهم اني اعوذ بك ان اضل او اضل ان اذل او اذل ان اظلم او اظلم ان اجهل او يجهل علي غفرانك يارب العالمين

يوا هنا لو سمحت لسواق التاكسي او الميكروباص

الحمدلله كويسة لما حد بيسألني اخبارك ايه



حاجات بعملهم وعايز أبطلهم


استني كدا بفكر في أجابة السؤال

لآ بيتهيألي مفيش حاجة بعملها ونفسي ابطلها

أصلي اتعودت استمتع بكل حاجة بعملها

بجد صدقني مفيش



سبع مدونات بزورها بأنتظام


قصاقيص حبيبة

Whish I were butterfly

مدونة الطاغية سكايار

يوم جديد

انسان مقيد

رحيق العمر

ممكن

Let me fly

ولو

وكل المدونات اللي عندي في البلوج بتابعهم

رغم اني نادرا لما بسيب كومنت بس دا مش معناه اني ما بتابعش



أشخاص أتمنى أقابلهم


زمان وانا في ثانوية عامة كان نفسي اقابل انيس منصور قريتله في الفترة دي كتيير من كتبه واتأثرت بيه جدا

جمال مبارك الكلام دا وانا في الجامعه بس دا فيلم عربي طويل ماتشغلوش بالكوا بيه لأنه راح لحاله خلاص

ممكن اكون نفسي اقابل ناس كتيير بس مش متذكراهم حاليا



حاجات بتقلقني


اكون مستنية نتيجة امتحان

في مشكلة حصلت لحد من اهلي او اصحابي ببئي قلقانة عليهم

القلق نفسه بيقلقني



حاجات ما أظنش إنها هتتغير فيا أبداً


انا . ما اعتقدش اني ممكن اتغير

.انا بحب نفسي كدا وسعيدة بنفسي كدا

جربت مرة اتغير وماحبتنيش واكتشفت ان مفيش حد يستاهل انك تتغير علشانه حتي لو قالك انه بيحبك

لأن ببساطة جدا ممكن يكون كداب



أغنية لازقة في دماغي اليومين دول


هل عندك شك انك احلي واغلي امرأة في الدنيا وأهم امرأة في الدنيا

هل عندك شك ان دخولك في قلبي هو أعظم يوم في التاريخ وأجمل خبر في الدنيا

الأغنية لكاظم الساهر



صورة مش قادر أشيلها من مخي اليومين دول


صورة الغدر والكدب اللي بئي سهل وعادي عند كتيير من الناس



حاجة ندمان عليها (مش أوي يعني


مابتستسلمش للندم

بيجيلي أه بس بصراحة لسه ماحصلتليش الحاجة اللي تخليني اندم واقول بجد انا ندمانة

الحمدلله ربنا بيوفقني في حياتي وبيكرمني



ناس يا ريت يكتبوا حاجاتهم و محتاجاتهم


أي حد نفسه في التاج ياجماعة

ماياخدوش غير لما يستأذن مني

أه هي مش سايبة

أينعم انا دخلت أخدته من مدونة ولو" من غير ما أستأذن بس دا مش معناه انكوا تعملوا زيي


طبعا انا بهزر وانتوا عارفين كدا كويس

اللي عاوز التاج ياخده بس برده يستأذن P: