Tuesday, January 29, 2008

اول تاج ليا



أخير بجاوب علي أول تاج ليا

هو جالي من مدونة

ابن ايجيبت

وجالي برده من مدونة ولو



قالوا لك اختار عصر من عصور مصر علشان تعيش فيه تختار أى عصر وفى عهد أى حاكم واشمعنى ؟
كل العصور في مصر مرت بمراحل صعبه وكل عصر له مميزاته وعيوبه انما انا لو ركبت ألة الزمن واختارت أي عصر منهم ها اختار الوقت اللي كان سيدنا يوسف في مصر يمكن اقابله ايامها او اشوفه
واختار كمان عصر ايام نصر اكتوبر
لان دي كانت هاتبئي اكتر لحظه في حياتي قلبي هايفرح فيها


أول أولوية فى حياتك عيلتك ولا شغلك ولا اصحابك؟
عيلتي وبعدين اصحابي وبعدين شغلي ..

ايه أكتر حاجة بتحبها فى رمضان ؟
ايام رمضان كلها اجمل من بعض
بحب قراءة القرأن ...اللمه...ساعة الفطار...صلاة التراويح

اوصف اجمل فطار ممكن تفطره؟
غالبا مابحبش افطر
انما اجمل فطار ممكن افطره يكون مع محمد اخويا
وايات صاحبتي
لان الشخصين دول أكتر حد نفسي بتتفتح وياهم


لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل؟؟؟
دلوئتي وانا بجاوب علي التاج اقولك اه ها ابئي ان شاء الله حاكم عادل لان دي نيتي فعلا
اتأكد ازاي من ان انا عادل ولا لآ
ها اسأل الناس اللي بحكمهم واشوفهم راضيين ولا لآ
وها استشير اصحاب الرأي السديد
وها اقرب من ربنا وادعيه انه يوفئني

مين أكتر اعلامي مصري بتحترمه؟
وائل الابراشي..شجاع
مني الشاذلي...ضيوفها مالهومش حل

لو ممكن تشتغل شغلانة تانية كنت تتمنى تبقى ايه ؟؟
هي مش شغلانه
انما كنت بحلم زمان ابئي فيلسوفه

ايه تانى بلد تتمنى تعيش فيها بعد مصر ؟؟
كوريا الجنوبيه
او أي دوله من دول النمور الاسيويه
كنت بدرسهم في تالته اعدادي وكنت معجبه بيهم جدا كبلد وكطبيعه وكشعب


اوصف ترتيبات اجمل فرح ممكن تحضره؟
يكون فرح هادي مفيهوش الاغاني الشعبيه الفظيعه دي
وصوت الدجي يكون معقول
واكون علي علاقه وطيدة بالعروسه والعريس_يقربولي يعني_
ودا حصل فعلا في فرح صاحبتي وبنت خالتي في نفس الوقت
كان فرح تحفه وكنت فرحانه فيه جدا جدا

بتراعى كلام الناس والقيل والقال ؟؟ ولو اه او لا قول ليه؟
مش دايما براعي كلامهم
جوايا اقتناع تام انه مهما حصل الناس مش هاتبطل كلام عن بعض سواء بالخير او بالشر
ولو فضلت أفكر في كلامهم مش ها أخلص
انما الاشخاص القريبين مني يهمني كلامهم عني ويهمني رايهم فيا
ويهمني مايزعلوش مني
ولو حصل سوء تفاهم لازم اوضحهولهم

صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟
ها اكون سعيدة جدا جدا
العصر دا اصلا بيشدني ليه من وقت للتاني
بحس فيه بهدوء غير عادي
انما اكتر حاجه ها افتقدها فعلا هو النت

السعادة هي؟
الرضا بقضاء الله وقدره

لما بتحب تهرب من كل شئ بتروح فين؟؟
بسافر انا وقلبي بعيد بعيد
اصنع احلام جميله واعيش فيها
او اقعد افكر في ربنا والدنيا والحياة والموت
او اقعد علي النت


امتى اول مرة خدت فيها نفس طويل وقلت ياااه انا فعلا كبرت؟؟
وانا صغيرة كنت حاسة اني كبيرة وسابقه سني
ولما كبرت حسيت اني صغيرة والدنيا دي كبييرة عليا

بتشرب سجاير وايه شعورك اما ست او راجل بيشرب سجاير ؟ ليه؟؟
لامابشربش سجاير
بصراحه موضوع السجاير دا عمري مافكرت فيه
سواء اني استنكر شرب السجاير او اني اشيد بيه
ودا بسبب ان في اشخاص بحبهم اوي بيدخنوا

بتعرف ايدك اليمين من الشمال ازاى؟؟
سهلة اوي
ايدي اليمين فيها خاتم وغويشتين
انما ايدي الشمال ياحول الله فاضيه

ايه اكتر موسيقى بتحبها؟؟
الموسيقي الهادية الحزينه
فى رأيك ليه؟؟ الذوق والنخوة اتعدموا ؟
لا ما اتعدموش
موجودين
بس يمكن قليلين او ان اننا بخلا شويه في مشاعرنا
او اننا شايفين الناس ماتستاهلش


ايه الحاجة اللى لو حصلت لك حتبقى سعيد اوى؟
1 – اتخرج السنادي من الكليه
2_جروب المشروع بتاعي يكون من ال 10 الاوائل في مسابقة صنع في مصر

تحب يبقى عندك ارض زراعية ولااجنس عربيات ولاكام عمارة ولافلوس فى البنك ؟
يكون عندي ارض زراعيه
البحر ولا النيل؟
بعشقهم الاتنين انما البحر اكتر شويه
مركب ولا طيارة؟
عمري ماركبت طيارة
علشان كدا ها اختار مركب
دا غير ان المركب وانا فيه ها ابئي مستمتعه بالطبيعه والشمس والهوا والميه
والكلام دا مش موجود في الطياره

عاقل ولا مجنون؟
عاقله_دا راي معظم الناس فيا

_
تقرا كتاب ولا تتفرج علي فيلم؟
علي حسب الحالة المزاجيه بتاعتي
بس غالبا ها اتفرج علي الفيلم

اللى بيبوظ الحكام .. نفسهم؟ ولا الشعب؟ ولا الحاشيه المقربه؟
كل دول
بس اصلا الحكام بيكون عندهم استعداد لكدا
عاوزين ينهبوا ويتمتعوا علي حساب الشعب
الشعب بئي عاوز من الحكام كل حاجه بيكسل دا غير انه برده بيكون عنده استعداد للفساد وبيبرر اللي بيعمله بفساد الحكام


عندك أمل ؟؟ أسبابك ؟
اه عندي لان ربنا موجود
"انه لاييأس من روح الله الا القوم الكافرون"


لما بتعمل عمل خيرى بيكون ايه هو دافعك الاول؟
الموقف ذات نفسه حركني من جوه ولا لآ
مدي اخلاصي في العمل دا لربنا
الصحابه وأد ايه كانوا بيساعدوا بعض حتي وهما محتاجين "ويؤثرون علي أنفسهم ولو كان بهم خصاصه"


ايه اكتر اله موسيقيه بتحبها ؟
البيانو
لان دي الاله الوحيدة اللي اتيح ليا اللعب عليها

تمرر التاج ده لمين ؟
لكل الناس اللي عندي

Monday, January 21, 2008

ربما لاحقا سأفعل




لائيتني فجأة بعيش في قصر كبيير مع أشيائي
ووحش_هكذا كان يبدو_يوقظني كل صباح ويظل معي حتي أنام
أدركت لاحقا أنه رقيق
يرقص معي كل مساء
يقضي معي كل اللحظات
يقسو علي أحيانا ويحنو أحيانا أخري
سألته:لماذا يكرهك الناس رغم رقتك؟
قال:ومن قال أنهم يكرهوني لو كان الأمر كذلك ماقضوا معي أوقاتا أكثر من الأوقات التي يقضوها مع الفرح
قلت:ربما لان أوجاعهم كبيرة
قال:لا ياعزيزتي فانا أعود بالقلوب إلي الله وطالما كانوا معي صغرت الدنيا وهانت في أعينهم
ولكن هناك من لايفهمني فتهون عليه حياته بدلا من أن تهون عليه دنياه ويعزب عن الحياة وييأس من رحمة الله وقتها فقط أصبح وحشا وتتكالب وحوشا أخري علي القلب كالهم
قلت:ومتي ستتركني ارحل أنا وأشيائي من هنا
قال:حينما ترغبين في ذلك لن أمنعك أبواب القصر غير موصودة افتحيها واخرجي
فالحياة بالخارج أجمل
صمت طويلا وسرحت قليلا
نظرت اليه وابتسمت ابتسامة أضاءت روحي
وقلت:ربما لاحقا سأفعل

Saturday, January 5, 2008

ولكني أسألك اللطف فيه


وإحنا مجروحين بنبقي أنقي وأصفي مش بس مع الناس
كمان مع ربنا ونفسنا


إحساسك بالظلم موجع جدا إنما بيحمل معاه إحساس بالأمان

لان حقك عند ربنا واللي عند ربنا مابيضيعش

اللهم إني لا أسالك رد القضاء ولكني أسألك اللطف فيه
ولكني أسألك اللطف فيه
ولكني أسألك اللطف فيه

لو قدرنا نحس بلطف ربنا بينا عند أي مشكله ومصيبة بتقابلنا
قلوبنا هايدخلها نور نور جاي من السما
مش نور الشمس ولا نور القمر
دا نور تاني اقوي وأجمل
نور جاي من عند ربنا ينور قلوبنا فتنور وجوهنا

تعيش تردد الحمد لله ....الحمد لله....الحمد لله
الحمد لله علي إن قلبك منور بالحمد لله