Monday, July 19, 2010

(2)..شيكولاته بالبندق


بعدها بكام يوم كنت نازلة الحسابات اخلص شوية ورق لاقيته هناك ..قاعد علي مكتب وبيشتغل علي كمبيوتر ...طبعا اندهشت وفضلت فترة واقفة مكاني بستوعب اللي انا شايفاه

مشيت ناحية مكتبه براحة وقولتله: انت بتعمل ايه هنا؟
بصلي وقالي: ازيك يا نغم اخبارك ايه؟
انا: تمام الحمدلله....ماقولتليش برده انت بتعمل ايه هنا؟
ابتسم وقالي: الله يسلمك يا ستي انا الحمدلله كويس
انا: اه معلش اصل انا اندهشت لما لاقيتك هنا
هو: انا بشتغل هنا محاسب ودا اول يوم ليا في الشغل
انا: ايه دا بجد ؟!!!
هو: لا بهزر...اه بجد بس انا كنت في الفرع اللي في حلوان...و طلبت نقلي في الفرع اللي هنا
انا: اممممممم ماشي ..يارب تتبسط معانا.....
هو: ربنا يسمع منك

مشيت من عنده ....وانا بقول فعلا فعلا سبحان الله ...يعني بقينا زمايل في الشغل كمان


آخر اليوم قابلته وانا خارجة سلمت عليه ...خلاص بقي احنا بقينا زمايل دلوقتي وماينفعش اطنش واعمل نفسي مش شايفاه زي ماعملت قبل كدا

انا: السلام عليكم
هو: وعليكم السلام ....مش معقول نغم هانم بذات نفسها بتقولي سلام عليكم
ابتسمت وسكت
كمل وقالي: بس تعرفي ان اسمك حلو اوي
انا: اه ما انت قولتلي مرة قبل كدا
ابتسم وقالي: امممممم .... مش ملاحظة انك بتحرجيني كتييير
انا: انا؟!!!!!!! لا والله ما قصدي انت ادايقت ولا ايه
هو: لا طبعا ...انا عمري ما ادايق منك

اوباااااااااا هو في ايه بالظبط انا مش مطمنة

استعبطت وقولتله: شكرا

هو: برده؟!!...ماعلينا ياستي...يعني ما سألتنيش علي اسمي
انا: فعلا ما سألتكش؟

وكان باين اوي اني بكدب

ابتسم – وانا عارفة ان ابتسامته دي معناها انه فاهمني وعارف اني بكدب-
قالي: اه ما سألتنيش...تحبي تعرفي ولا مش مهم
انا: لا خلاص ماشي..اسمك ايه
هو:حسام..
انا: اهلا وسهلا
هو: اهلا بيكي يافندم


ما اعرفش ليه يومها انا نمت فرحانة اوي وصحيت تاني يوم لبست واتزوقت وكنت حاسة ان الدنيا احلوت فجأة وحلتني معاها

اول لما شافني في الشغل قالي: ماشاء الله
انا بااستغراب كدا: ماشاء الله علي ايه؟
هو: قوليلي صحيح هو القمر بيطلع بالنهار
حسيت بخدودي بتطلع نار وقولتله: قمر ايه؟
قالي:لالا ماتاخديش في بالك

اتظاهرت كأن موبايلي بيرن واستأذنت منه قال ايه برد علي الموبايل
اصلا انا كنت ساعتها مرتبكة جدا وكنت مكسوفة خالص


مشيت وانا قلبي فضل يدق يدق مش قادرة....دخلت المكتب واحدة زميلتي لاحظت اني مش علي بعضي قالتلي: مالك يانغم وشك احمر كدا ليه؟
انا: لا والله.... احمر اوي؟
هي: اوي اوي
انا: لا اصل في عربية فرملت عليا وانا جاية فا اتخضيت بس
هي: طيب انتي حصلك حاجة
انا: لالا الحمدلله جت سليمة انا كويسة زي ما انتي شايفة اهو

وما اعرفش ليه في اليوم دا حسيت احساس بالسعادة زي اللي بحسه بعد ماباكل شيكولاته

روحت البيت واتصلت بصاحبتي وحكيتلها كل حاجة ......
قالتلي انه بيحاول يتقرب منك بس الله اعلم ايه نيته ... ونصحتني اتجاهل الوضع واعمل نفسي مش واخدة بالي لحد مايفصح عن نواياه
انا: لا اطمني خااااالص .....انا بعامله في حدود انه زميلي وبس


تاني يوم في الشغل ....جه المكتب عندي واتعرف علي باقي زمايلي ..وبقي بييجي المكتب عندنا كتيير كل مرة بحجة شكل بس انا كنت بحس انه بييجي علشاني حتي زمايلي في الشغل اخدوا بالهم وبدأوا يلمحوا كدا بس انا كنت بقولهم علشان احنا معرفة من زمان فا انا اكتر واحدة بيتكلم معاها هنا في الشغل خصوصا انه لسه جديد يعني

مرة في يوم واحنا مروحين لاقيته بيقولي :تعرفي ان انا مبسوط اوي اني نقلت في فرع الشركة اللي هنا
انا: ربنا يبسطك كمان وكمان...بصراحة الناس هنا محترمة ويتحبوا
هو: ايواااا عليكي نور ..هيا يتحبوا دي

سكت وابتسمت وماعرفتش ارد حسيت انه بيلمح لحاجة

بعدين كمل كلامه وقالي: بس انتي اتغيرتي شوية عن اول مرة قابلتك فيها في القطر

اختفت الابتسامة من علي وشي وقولتله: تقصد ايه با اتغيرت دي؟
هو: ايه مالك ادايقتي ولا ايه؟...انا اقصد انك كنتي في القطر متحدثة وبتتكلمي علي راحتك معايا وماكنتيش تعرفيني...انما دلوقتي حاسس انك بتحاولي تقللي الكلام معايا مع اننا خلاص بقينا نعرف بعض كويس

انا بنرفزة: كلام ايه اللي انا بقلله معاك...وبعدين في القطر انا ماكنتش متحدثة ولا حاجة كل الحكاية اني عزمت عليك بشيكولاته عادي يعني وانت بعدها اللي فضلت تتكلم وتسألني

هو: انا ليه حاسس انك بتفهمي كلامي غلط...او انك متصورة انك لما كلمتيني في القطر انك بنت مش كويسة

قاطعته وقولتله: ما اسمهاش كلمتيني اسمها اتكلمنا

ابتسم وقالي: ولا تزعلي نفسك...اسمها كلمتك..حلو كدا
قولتله: انا بس اتعودت لما اكون باكل حاجة اعزم بيها علي الناس
هو: تعرفي بقي ان الشيكولاته اللي انا اخدتها منك دي احلي حاجة حد ادهالي
انا والنرفزة كانت راحت : بجد؟
هو: اه طبعا بجد..وخصوصا انها كانت من بنت زي القمر زيك

ينفع كدا يعني..اعمل ايه انا دلوقتي وارد عليه اقوله ايه
لا ويقولي اصلك بقيتي بتقللي من الكلام معايا ...ماهو مش ذكي ومايعرفش اني بتكسف من كلامه وانا لما بتكسف الدم اللي في جسمي كله بيتجمع في وشي وبرتبك وبيبان عليا

قولتله: اه صحيح انت ايه رأيك في الكلام اللي المدير قال عليه النهاردا في الاجتماع

كان باين موت اني بتوه وبغير الموضوع

ابتسم وقالي: تعرفي يا نغم اني بحب بساطتك دي جدا

استغربت وقولتله: بساطة ايه....انت ليه بتقول كدا
هو: اصلي لما قولتلك انتي زي القمر انتي اتكسفتي بس اتظاهرتي انك ما اتكسفتيش ولا حاجة وغيرتي الموضوع
انا: ولنفرض ان دا اللي حصل...ايه علاقة دا بالبساطة
هو:ان أي حاجة بتعمليها وبتقوليها لو مش هي اللي جواكي او اللي بتعبر عنك بتبان وبتبقي واضحة
انا: تقصد يعني ان انا كتاب مفتوح
هو: مش للدرجادي يعني ...بس انتي انسانة بسيطة وتلقائية ودي اكتر حاجة بحبها فيكي

وبعدين بقي ياجماعة الكلام دا مايتسكتش عليه انا ما اقدرش استحمل كلامه دا....

قولتله طيب بعد اذنك ارد علي الموبايل..وطبعا الموبايل ولا كان بيرن ولا حاجة بس انا قولت آخد فاصل اعلاني من كلامه وزوقه

لما رجعت لاقيته بيقولي: انا ملاحظ حاجة غريبة
انا: خير...؟
هو: موبايلك بيرن ومابسمعلوش صوت ليه؟
انا وكنت حاسة انه كشفني بس انا تماسكت وقولتله: اصل انا عاملاه فايبريشين
هو: فعلا؟؟
انا: مش مصدق يعني ..طيب رن عليا وانت تشوف بنفسك

ايه اللي انا قولته دا ...فعلا علي راسي بطحة...افرضي رن دلوقتي هاتعملي ايه...

هو: لا طبعا مصدقك...ممكن اسألك سؤال؟.
انا: اتفضل
هو: انتي ليه دايما بتفترضي سوء النية في كلامي
انا: لا ابدا .....انا بس تلاقيني مابعرفش ارد او اتكلم
هو: فين دا...امال في العلاقات العامة ازاي

طبعا هو عنده حق في اللي بيقوله انا ما اعرفش ليه بعمل معاه كدا .....وقررت ابطل الحوارات الداخلية اللي مع نفسي واحسن النية فيه وفي كلامه خصوصا انه حد محترم وزوق

انا: طيب خلاص لو انت حسيت دا من كلامي حقك عليا دا بدون قصد مني
هو: انا بس عاوزك تعرفي انك ليكي عندي معزة خاصة
انا: ربنا يخليك ..

انا بعد كدا بطلت مشاكسة مع نفسي وبقيت حد وديع ومسالم جدا حتي هو اخد باله اني اتغيرت...بصراحة انا بقيت بفكر فيه كتيير وبقيت بحب الشغل جدا وخصوصا وقت المرواح واحنا نازلين من علي السلم

كان هو في مرة عندنا في المكتب وموبايل واحدة صاحبتي رن وكانت حاطة رنتها اغنية لتامر حسني اسمها"انا شكلي هااحبك ولا ايه"
لاقيته بيقول" الله الأغنية دي حلوة اوي...وطلب من زميلتنا تبعتهاله علي البلوتوث

قولتله: بس دي لتامر حسني
هو:طيب ودي فيها ايه
انا: اصل انتوا بتكرهوا تامر
هو:انتوا اللي هوا مين؟
انا: الشباب يعني
هو:ومين قالك اني بحبه...بس اصل الاغنية عجبتني وبعدين الظروف بقي انتي عارفة
انا: ظروف ايه؟
هو: ابقي اسمعي الأغنية وانتي تعرفي

اول لما مشي اخدت الأغنية من زميلتي وسمعتها
"انا شكلي ها احبك ولا ايه
في حاجة في قلبي جديدة عليه
قلبي مسهرني...قلبي محيرني
انا ايه غيرني وبسأل عنك ..بسأل ليه
حالي مش حالي...ايه اللي جرالي
سهرني ليالي وانا كان مالي اسهر ليه"



انا فضلت اسمع في الأغنية دي طول اليوم
ولائتني بسأل نفسي: ياتري ايه الحاجة الجديدة اللي في قلبه
ومين دي اللي شكله هايحبها
طيب هو يقصد ايه ب اسمعيها وانتي تعرفي

دا واضح كدا ان انا اللي شكله ها احبه ان ماكنتش حبيته فعلا


.....يٌتبَع

5 comments:

آخر أيام الخريف said...

الله ...!!! حلوة قوى ... !! انا ازاى مشفتش مدونتك دى قبل كده...؟؟؟ عموما ملحوقة انا ان شاء الله هتابعك من هنا ورايح.بجد اسلوبك صادق و جميل جدا جدا

يسعدنى لو تشرفينى فى مدونتى


http://reeeshkalam.blogspot.com/

قلب ينبض لله said...

آخر أيام الخريف

اسم مدونتك جمييييييل جدا...احييكي عليه :)

خلاص ها استناكي في كل بوست انزله
وانتي كمان استنيني في كل بوست تنزليه:)

اسعدني مرورك وتعليقك

آخر أيام الخريف said...

أنا الأسعد يا شوكولاتة ... وشكلك كدهمنيرية جامدة زيى
:)

هتنورى المدونة بوجودك و أنا معاكى على الخط ... الواحد بيفرح لما بيلاقى مدونات بناتى رقيقة كده ...مش عارفة ليه و أنا بقرأ قصتك بتاعة الشوكولاتة دى افتكرت الفيلم اللى بموت فيه : فى شقة مصر الجديدة

قلب ينبض لله said...

آخر أيام الخريف

انا فعلا بحب منير :)
اكتر حاجة بتعجبني فيه انه مش شبه حد وماحدش بيشبه ومواضيع اغانية جديدة جدا وجميلة جدا

انا سعيدة جدا بمعرفتك والله
واتمني نبقي اصدقاء

بخصوص بقي فيلم شقة مصر الجديدة احب اقولك ان دا افضل افلامي علي الأطلاق وفرحت جدا لما حسيتي من القصة نفس الاحساس اللي بتحسيه من الفيلم
اصل بصراحة الفيلم دا بيسيب جوايا حالة كدا من التناغم والتفاؤل والأمل

آخر أيام الخريف said...

و أنا زيك تمام ..ده احنا شكلنا هنبقى اصحاب قوى ان شاء الله

انا ضفتك خلاص على كتاب الوش :)))