Sunday, July 25, 2010

(4)..شيكولاته بالبندق


تاني يوم الصبح قابلته علي السلم واحنا طالعين

لاقيته بيقولي: علي فكرة انا سمعت الأعنية امبارح...بجد اغنية جميلة جدا

ابتسمت وقولتله: اهم حاجة تكون جابت نتيجة

قالي: والله يانغم الحمدلله ...حاسس ان الخنقة راحت شوية

انا: ربنا يزيح عنك ..عموما زي ماقولتلك لو حبيت تتكلم انا مستعدة اسمعك



آخر اليوم جه قعد معايا شوية واتكلمنا في مواضيع عامة ....بس اللي كنت مستغرباله فعلا انه ماكانش بيكلمني خالص عن خطيبته ومابيجيبش سيرتها في أي موضوع...ما اعرفش ليه ماكنتش بحس انه خاطب ومرتبط

لا ما اقصدش علشان بيكلمني وبيقرب مني فتكون الاحساس دا عندي ..انه مش مرتبط عيني...انا قولت عادي اقف جمبه في محنته اللي انا ما اعرفش هيا ايه ...وخلاص احنا بقينا اخوات وبنتعامل علي هذا الاساس

عارفة ان موضوع اخوات دا صعب شوية ..قول شويتين بس انا لازم اساعد نفسي علشان اقدر اطلع من اللي حصل بأقل الخساير الممكنة



فضلت الدنيا ماشية علي كدا بتاع كام اسبوع والأمن مستتب والحياة مستقرة وكل شيء علي مايرام

لحد ماجت زميلتي في المكتب وبتقولي: ماعرفتيش اللي حصل؟

انا: خير في ايه؟

هي: مش حسام فركش

انا: ف ايه..؟ فركش.؟!!!...انتي عرفتي ازاي

هي: النهاردا الصبح كان واقف معانا وقالنا

انا: ليه كدا ...ايه اللي حصل

هي: لا ماقالش ...كل اللي قاله مفيش نصيب



انا ساعتها ادايقت ...حتي استغربت نفسي جدا..المفروض كنت افرح يعني صحيح انا خلاص مابقاش في حاجة ناحيته مني بس علي الاقل دا حب قديم واكيد لو دورت هالاقي جوايا رغبة في الرجوع..



ماكنتش عارفة ايه رد الفعل اللي المفروض اخده دلوقتي...هل اروحله المكتب اكلمه ولا استني آخر اليوم ولا اطنش واعمل نفسي ماعرفتش

وانا قاعدة بكلم نفسي واشوف ها اعمل ايه واقوله ايه

لاقيته داخل المكتب وجاي ناحيتي

هو: ازيك يانغم

انا: الحمدلله....صحيح اللي سمعته دا ...انت فركشت

هو: اه ...مفيش نصيب

انا: ليه كدا دا انتوا مابقالكوش مع بعض كام شهر

هو: ما انا قولتلك مفيش نصيب...وبعدين الحاجات دي بتبان علي طول ...يلا حصل خير

انا: ماتزعلش نفسك ان شاء الله ربنا يكرمك

هو:لا ابدا انا مش زعلان ...المهم سيبك من كل دا ....عاوزك تبعتيلي اغنية محمد منير تاني لأن انا فرمت كارت الميموري امبارح ومسحت من عليه كل حاجة

انا: هي الأغنية عاجباك اوي كدا

هو: ماتتصوريش ازاي...لا فعلا فيها شحنة امل وتفاؤل غير عادية




بعتله الاغنية واخدها ومشي.... كان باين عليه شوية انه متأثر رغم انه كان بيتظاهر ان مفيش حاجة ...باين عليه حبها واتعلق بيها...لو دا حصل كان المفروض يعمل المستحيل علشان يتمسك بيها

لاقتني برد علي نفسي واقول: انتي غريبة يانغم بتتكلمي زي مايكون عمرك ما حبتيه قبل كدا ولا نفسك ترجعوا لبعض تاني

اه حبيته بس خلاص مابقاش ينفع نرجع لبعض....هو يخطب يفركش ..يتجوز يطلق ..خلاص خلصنا كل ماهنالك اني بتمناله الخير ...انا جوايا حلو مش وحش حتي لو الشخص عمل فيا حاجة وحشه..وانا خلاص اقنعت نفسي ان انا السبب وانا اللي اتهيألي انه كان بيحبني وعلقت نفسي بيه علي الفاضي




مشيت الأيام بعد كدا مملة موووووووووت مفيش جديد بيحصل

انا بقيت عاقلة ورزينة كدا وبقيت مستبياخاني ..نفسي اعرف العقل دا حط عليا منين...وهو بقي كلامه قليل لو حصل كلام بينا بيكون يا اما اول اليوم يا اما آخر اليوم وخلاص علي كدا



مرة لاقيته داخل عندي المكتب وبيقولي:الله امال باقي الناس فين

قولتله: 2 ماجوش اصلا النهاردا والتالتة عملت اذن ومشيت

هو: دا يبقي من حسن حظي بقي

انا: حسن حظك ازاي

هو: اصل انا بصراحة بقالي كام يوم كدا كنت عاوز اكلمك في موضوع لوحدنا ومش لاقي الفرصة المناسبة

انا : موضوع لوحدنا!!!!!!! خير ان شاء الله

هو: بصي يانغم ...بدون لف ودوران...انا عاوز اتقدملك

انا: ت ايه؟!!!!!!!!!!!!!!!!!

هو: اتقدملك ...ارتبط بيكي يعني

انا: ازاي يعني ...معلش مش واخدة بالي

هو: ايه يانغم ...مش واخدة بالك من ايه بقولك عاوز اتقدملك

رديت عليه بعصبية وقولتله: لا والله دلوقتي بقي ينفع تخطب نغم....وقبل كدا ماكانش ينفع صح؟

هو: لا يانغم مش كدا


انا ولسه النرفزة في كلامي: اقولك انا اشمعني دلوقتي..انت خطبت واحدة وقعدتوا مع بعض فترة وفجأة فركشتوا والله اعلم ايه السبب مش عاوزة اعرف المهم بقي انت عاوز ترد القلم لخطيبتك دي وتقولها اهو الحياة مش واقفة عليكي لو عاوز اخطب ها اخطب من الصبح والف واحدة تتمناني

قومت مدور في دفاترك القديمة مين اللي هاترضي بيا مين اللي هاتواقف عليا مالاقيتش غير نغم...اه دي شكلها بتحبني ...اوعي تكون فاكر اني لما وقفت جمبك في محنتك اني بحبك ...اظن كلامي كان واضح وقولتلك اننا زمايل واخوات....



هو وكان مندهش جدا من كلامي: ايه اللي بتقوليه دا يانغم ....

انا: اللي سمعته...هي دي الحقيقة اللي لازم تواجه بيها نفسك ما انا قدامك من زمان اشمعني دلوقتي فكرت ترتبط بيا

هو: خلاص يا نغم ....انا آسف



وسابني ومشي وانا قعدت واتفتحت في العياط

ايه اللي انتي قولتيه دا يانغم كان ممكن ترفضي وخلاص ....ليه قولتي كدا وليه اتكلمتي بالطريقة دي

يومها مشيت بدري من الشغل ....وعرفت ساعتها واتأكدت اني مانسيتلوش اللي عمله فيا وان حكاية العقل والحكمة اللي نزلت عليا دي كانت حاجة وقتيه لأني لو عاقلة فعلا كنت رفضت وخلاص



انا اول حاجة ها اعملها بكرة اني هااروح واعتذرله علي الكلام البايخ اللي قولته...يعني حتي لو ماحصلش نصيب احب العلاقة مابينا تكون كويسة

انما باللي قولته دا انا عجنت الدنيا خالص

وفعلا اول لما وصلت الشغل روحت علشان اتأسفله


انا: السلام عليكم ...ازيك يا حسام

هو-وكان مصدر الوش الخشب-: وعليكم السلام ...الحمدلله كويس

وسكت ...ايه دا مفيش ازيك يانغم لا دا واضح انه فعلا زعلان مني

مش مشكلة يا نغم خليها عليكي المرادي انتي جاية تعتذري عن حاجة وهاتمشي وبعد كدا هو حر مع نفسه علشان ماتبقيش غلطتي في حاجة

انا: بص انا مش هااعطلك هما كلمتين وها امشي

هو-وكان بيشتغل علي الكمبيوتر ومن غير مايرفع عينه من علي الشاشة-: خير كلمتين ايه اتفضلي قولي انا سامعك

انا: لا والله سامعني ازاي وانت مشغول في حاجة تانية.....انا مش هاآخد من وقتك كتير

هو-التفت ليا -: اوك كدا كويس

وكان بيقولها من تحت الضرس



اللهم طولك ياروح.....اه ماله حق يعمل كدا واكتر من كدا كمان...هو اكيد عارف انا جاية ليه....اه جاية اعتذرله



انا: بخصوص الكلام اللي قولتهولك امبارح...



لاقتني سكت وبقول لنفسي هاتعتذري عن ايه هو مين للي يعتذر لمين

هو ماكفاهوش انه علقني بيه كمان جاي يتقدملي بمنتهي السهولة بعد كام اسبوع من فركشته ..هو فاكر نفسه ايه...لا يستاهل اللي قولتهوله واكتر كمان

هو: ها يا نغم سكتي ليه

انا: انا كنت جاية اقولك علي حاجة كدا بس مش ها اقولها

هو: ليه؟!!!

انا: من غير ليه ...فكرت ولاقيت ان ماينفعش اقولها....مابقاش ينفع اقولك أي حاجة بعد كدا....كل اللي عاوزاك تعرفه ان كل حاجة في الدنيا دي ليها وقت معين تتعمل فيه ولو ما اتعملتش في الوقت دا ماينفعش تتعمل في أي وقت تاني

هو: حاجة ايه ووقت ايه ..انا مش فاهم حاجة

انا: لو حبيت تفهم هاتفهم.. المشكلة عندك انت



وسيبته ومشيت ....انا كنت اقصد انه المفروض كان يتقدم ليا في الوقت اللي كنت بحبه فيه ومتعلقة بيه..انما بعد ماخطب وفركش ارتباطه بيا فقد معناه وفقد فرحتي بيه.....



كنت ها اغلط غلطة عمري لو كنت اعتذرتله مش بس علشان ان انا ماعملتش حاجة غلط اعتذر عليها كل اللي عملته ان اتكلمت بصراحة وقولت اللي جوايا انما كمان علشان كان هايفسر اعتذاري دا اني موافقة علي طلبه وبفتح الطريق له انه يرجع يتقدم تاني وساعتها كان الغرور هاياخده ويفتكر نفسه حاجة وماكانش هايتقدم تاني

بقيت مستغربة نفسي ومستغربة تفكيري وسوء ظني بيه....بس ساعات كنت ارجع واقول هو دا الصح اللي انا عملته وتفكيري فيه مش سوء ظن ولاحاجة ...وان مايستاهلش اعتذاري ليه



يُتبَع.......


19 comments:

Mohammed Adel said...

بصراحه عندها حق فى ردة فعلها بس كان مبالغ فيها شويه
وقرارها تمام لان اكيد محدش بيحب يبقى الشئ الاحتياطى فى حياته

والله اعلم يمكن باقى الاحداث الجايه تظهر حاجات عكس كل ده وانا متوقع كده :D

صحيح يارضوى ليه عايزه الكومنتات هنا؟؟

Anonymous said...

ha2olek el sra7ah el story kant mashyah 7elw 2wy ... bas el 7l2ah dih faltt mnek... ana fi ra2y hyah kdh ma25dtsh 7a2ha 5als... bel3ks kant fedlt be32laha le7ad ma3rft hwah sab el tanyah leeh.... dah law kant lesa hyah 3yzah we dah elly ana shyfah en hyah lesa 3yzah we dah kolo kant btmasl 3shan maknsh 2odamha 7al tani...
2w kant sem3to behdo2 we sem3et el klam elly kan gay ye2olo we ba3den sabt le nafsaha forsah tefkr.

lakn ana shyfah enha kdh etnazlt 3n 7a2ha we bayntlo enha kant bet7bo ma3 en el klam elly kan by2olholha malosh ma3na kbeer ya3ni ... hyah elly et3l2t bih weklamo sa3dha lakn hwah wared en maknsh fi nyto 7agah men el 2wal... we lama erta7 fil klam m3aha we ray7to bel song fakr fiha

Hope enek terg3elha sha5sytha el 32la next eppisode :D

Unknown said...

hii ana reem :
bosy ana kda 3gbny radd fe3laha w tar2t tafkerha
hwa da el sa77 ... ana 2olt lk mn el aeel el wad da msh mry7ny :)

sanyan ana 3agbny awi klmtk en el 7aga amma tegy fel wa2t el 3'alat btb2a msh 7lw

bravo awiiiiiiiiiiiiiii

NONO said...

هى لو بتحبه بجد مش هتثور عليه بالشكل ده . كل الناس معجبة برد فعلها بس انا شايفة انه قاسى قوى
اللى بيحب عمره ما بيجرح حتى لو كان هو مجروح .
عموما هو جرحها وهى جرحته كده يبقوا خالصين ويقضوها صداقة وزمالة أحسن ليه وليها

قلب ينبض لله said...

mohammed Adel

مبالغ فيه..دا الود ودها كانت كسرت فازة فوق راسه بس هيا اللي مسكت نفسها :D

هي اخدت القرار الصح بس اعتقد بشكل خاطيء والدليل علي كدا انها قررت تعتذرله تاني يوم بس كرامتها بقي :D:D

انا عاوزة الكومنتات هنا
علشان هنا الأصل
كمان الأكونت بتاعي علي الفيس فيه مشاكل...ممكن يتلغي في اي وقت

قلب ينبض لله said...

sara :)

لا ياسارة هي مش فكرة تاخد حقها او ماتاخدوش ..رد فعلها عليه كان تلقائي وعفوي ..كل اللي قولتيه في رد فعلها دا الصح وانها كان المفروض تسكت لحد ماتشوف آخره ايه او كانت رفضت وخلاص والدليل علي كدا انها فكرت في دا بعد ماقالتله انها مش مركونة علي الرف وحسيت ان كلامها له ماكانش رد الفعل الصح

لو تلاحظي يا سارة ان نغم من اول القصة بنت تلقائة جدا مابتفكرش في الحاجة غير بعد لما تعملها بدليل انها لما حسيت انها عقلت قالت مااعرفش العقل دا حط عليا منين :D:D
وهي لو بتفكر بعقلها ماكانش حصلها اللي حصلها

بصي انا مابقدمش بنت مثالية بتفكر وعاقلة وبتفهم انما بقدم بنت زي بنات كتيير بيندفعوا في كلامهم وافعالهم ومشاعرهم وبمشي مع الأحداث لحد مانشوف ايه هايحصل في الآخر

اوعدك ان في الحلقة الجاية هاتشوفي نغم تانية خاااااااااالص :D:D

قلب ينبض لله said...

Reem salama

ازيك ياريم:) ايه النور دا :)

فعلا ياريم انا فاكرة انك من الأول خالص والواد دا انتي مش مرتحاله :D

ياريته بس يفهم هي تقصد ايه

:)

قلب ينبض لله said...

nono

ماهي مابقيتش تحبه يانوجة زي زمان وثورتها عليه علشان حسيت انه جرحها لتاني مرة

لا مش كل الناس معجبة برد فعلها ..سارة مش معجبة :)

عموما هو جرحها وهى جرحته كده يبقوا خالصين

امممممممممممم ماحدش عارف يانوجة بكرة فيه ايه ؟

taghreed said...

صحيح انا مع نغم في انها كان لازم ترفض بس ماكنش لازم تبين ضعفها امامه

قلب ينبض لله said...

taghreed

هي اندفعت ياتغريد من غيظها وفرستها
والله نغم دي غلبانة ولا انتي ايه رأيك يا تغريد؟
:) :D

Shreef said...

على فكرة ردة فعلها ديه مبررة تماما بالعكس ردها بالنرفزة ديه دليل على انها فعلا مجروحة ودليل على حبها ليه و بعدين انا استغربت انه اتفاجأ باللي حصل و ديه حاجة غريبة لانه ما اعتقدش انه كان يخفى عليه ان هي معجبه بيه الا اذا كان بئى تفكيره محدود او على قده و خصوصا ان الاعجاب بين الطرفين مش بيستخبى ابدا سواء بالنسبة للولد او للبنت .. و عجبني كمان انها مش اعتذرت و انها ثبتت على موقفها هي يمكن اذا كانت لازم تعتذر فتعتذر على الطريقة مش المبدأ .. بردو يتبع مع ان ما اعتقدش ان فيه كلام تاني يتقال او بمعنى اصح الموضوع منتهي .. عموما في انتظار البقية .. تحياتي يا رضوى و يدوب الحق لان التاكسي مستني على باب المدونة :D

آخر أيام الخريف said...

جامدة كالعادة .... مستنيين الباقى على احر من الجمر

قلب ينبض لله said...

shreef

ماهي قالت بعد كدا انها اكتشفت انها مانسيتلوش اللي عمله فيها زمان ودا ان دل علي شيء فانما يدل انها فعلا حبيته ولسه فاضل من الحب دا شوية في قلبها

انت فعلا عندك حق..هو لازم يكون واخد باله من اعجابها بيه ماهي قالت لصاحبتها انه اكيد شاف حبي له في عينيا والدليل علي كدا انه اتقدملها مباشرة بدون مايتولد عنده هاجس انها ممكن ترفضه لانه عارف انها معجبة بيه ويمكن دي اكتر حاجة دايقتها ونرفزتها ...هي اه بتحبه بس برده مش مركونة علي الرف

لسه باقي في القصة التفنيشة الأخيرة :D


تاكسي ايه بقي..ما احنا قولنا انت صاحب مكان وحافظ الطريق كويس وسهل عليك :D

قلب ينبض لله said...

آخر ايام الخريف

خلاص هانت يا نور
كلها كام يوم والحلقة الأخيرة تنزل :D:D

Anonymous said...

حسنا فعلت بأنها توقفت فى اللحظة الأخيرة عن الاعتذار

صحيح أن الاعتذار من الشيم العالية الكريمة .. الا انه يجب أن يكون عزيزا .. أحيانا أفضل عليه التجاهل .. والتصرف بتلقائية وطبيعية بكل حب وتفهم .. فاذا أثاره قرينك .. ساعتها فقط أعتذر بكلمة

جميلة وان كانت أمور الحياة لاتحسم بهذا الشكل .. الأولى أن تجلس معه .. وتتفهم أولا ماذا حدث .. ربما أخطأ .. وربما الظن بأن يريد أن يرد القلم غير وارد على الاطلاق .. من الحوار ستفهم كل شئ .. وتأخذ مهلة تستوثق فيها من استنتاجها

اذا كان لرد القلم .. فشكرا
وان كان لشئ آخر يمكن تجاوزه .. فاهلا

هى تحبه .. ويجب الا تتنازل عن حبها .. خصوصا وان الخطوبة صالوناتى لاعاطفة فيها

تحياتى لك

Anonymous said...

جميله جدا بصراحه احسن من رائعه وكمان قصه مشوقه جدا جدا يا بشمهندسه رضوى كان ليا تعليق على حاجه هو فعلا نغم كان عندها حق فى كلامها واى واحده فى مكنها كانت هتتصرف وندفع زيها دا لو كانت بتحبه هى مش لعبه فى ايده يخليها تحبه ويرتبط بغرها وبعدين يرجعلها
وشكرا

قلب ينبض لله said...

sherif

هي حسيت انها ماعملتش حاجة غلط تعتذر عليها وحسيت كمان انه هو اللي مفروض يعتذر

انا مع حضرتك فعلا انها كان لازم تتكلم بهدوء وتشوف هو ليه اتقدملها في الوقت دا بالذات ...بس علشان هي لسه في قلبها شوية حب ناحيته فااندفعت

اتمني انه يكون صادق في عواطفه تجاهها وربنا يجمعهم ببعض

:)

قلب ينبض لله said...

غادة

ايوا صح كدا زي ما انتي قولتي ياغادة انتي جيبتي المفيد
هي مش لعبة في ايده

:)

Anonymous said...

xanax without prescription xanax 833 - xanax for anxiety symptoms