التاج دا وصلني من مدون جامد جدا وقديم جدا في عالم التدوين وهو المهندس الكبير أوي حاتم صاحب مدونة ولو
هواياتي التدوين والقراية والنت والسفر والشوبنج طبعا لما تكون الحالة المادية كويسه وكان زمان ركوب العجل اللي مابئاش متاح ليا غير في المصايف وبس غير كدا ركوب العجل مستحيل
اشهر عيوبي الكسل أحيانا وأني بنسي كتيير زهايمر يعني تقدروا تقولوا أن في حد واخد عقلي لالالالالا ياجماعة مفيش حد واخد عقلي ولا حاجة دا أنا بهزر
حاجات بكرها جدا الأنتظار والقلق والملل والأكتئاب وخصوصا الأكتئاب
حاجات بحبها قوي ومش بمل من تكرارها أي حاجة بتشغلني بجد وبتفدني مابملش منها زي القراية مثلا
سؤال بيستفزني أنتي خريجة المعهد؟ أصل أنا عئبالكوا أشتغلت معيدة في معهد هندسة العاشر وأنا أصلا خريجة هندسة الزقازيق فكل ماحد يشوفني هناك يسألني السؤال دا هي الأمتحانات هاتبدأ أمتي؟ معاكي جدول الأمتحانات؟ أنا عمري مانقلت جدول أمتحانات ولا عمري شغلت بالي هي هاتبدأ أمتي فلما حد بيسألني السؤال دا ينرفزني لأنه بيفكرني بالأمتحانات وطبعا الأمتحانات دي معبودة الجماهير أقصد مقرفة الجماهير أيه دا خطك عامل كدا ليه؟ أصله شبه الخط الكوفي كدا او الخط الفارسي أو أي خط من الخطوط العربيه القديمة أنا بصراحة ما أعرفش هو خط أيه ماحد يشوفه يقولي انتي بتكتبي كدا أزاي رغم اني أدخلت عليه تغييرات كتير علشان يبئي شبه الخط المصري بس برده لسه بيستغربوه
امنيتي في الحياة لو أعتبرنا أن الأمنية زي الحلم فأنا قولت قبل كدا في التاج اللي فات اني أموت وأنا علي دين الأسلام أن شاء الله يارب ولو أعتبرنا أنها مش حلم ومجرد أمنية تتحقق وانا عايشة نفسي أبئي سيدة أعمال وما أعرفش ليه؟
حاجات مؤمن بيها جدا أن بعد العسر يسر كل مابتحصلنا مشكله وتكبر وتكبر ببئي عارفة أن بعدها فرح وخير أن الأنسان هو أروع وأجمل شخص في حياته علشان كدا لازم يتصالح مع نفسه ويثق فيها بالفعل مش بالكلام الألم مابيوجعش غير صاحبه
اكتر حاجة فاشل فيها الرسم بكافة أنواعه الهندسي أو العادي أشغال التريكو والخياطة والحاجات دي
وظيفة بحبها اللي بيشتغلوا في مجال الأعلانات ومدربين التنمية البشرية والمحامين وعلماء النفس
مثلي الاعلي في الحياة أي حد بيحقق المعادلة دي النجاح + الذكاء+الأخلاق+العلاقة الطيبه بالناس ببئي نفسي اكون زيه
وطبعا كالعادة بهدي التاج لكل حد يملك الوقت والدماغ أنه يجاوب عليه بس شرط مايركنوش عنده كتيير زي ما أنا بركن التاجات كدا لحد ماتاجات كتيير أوي ضاعت مني أدعولي ألائيها
التاج دا جالي من سمسم حبيبتي صاحبة مدونة أختكم في الله
وأحتمال كبير البوست اللي جاي يكون تاج برده
أصلهم كتيير أوي وأدعولي يخلصواا
أعطيتك ثلاث وردات .. من هم الثلاث أشخاص اللى هتهديهم الورد اللى معاك ؟؟
ها أدي وردة لبابا وماما وأخواتي
ووردة لأصحابي اللي قضيت معاهم أحلي أوقات وأجمل لحظات و أصحابي اللي عرفتهم من عالم التدوين
والوردة التالتة خليها معايا علشان ها اديها لحد معين بس لما اقابله فاهمني طبعا:D
لو أعطيتك ورقة بيها 3 سطور فقط و قلت لك أكتب فيهم اللى أنت عايزه هتكتب إيه ؟؟
لو الورقة دي ماحدش هايشوفها غيري فانا عارفة ها أكتب فيها أيه
بس طبعا الورقة دي هايشوفها ناس كتيير اوييييي فعلشان كدا ها أكتب فيها ال 3 أدعية دول
اللهم لاتجعل في قلوبنا غلا للذين آمنوا وأغفر لنا ولأخواننا الذين سبقونا بالأيمان
الحمدلله حمدا كثيرا مباركا
وقل ربي زدني علما
ما هو هدفك فى الحياة ؟
أموت وأنا علي دين الأسلام
إن شاء الله بكرة هيكون أحسن من النهاردة "
هل تصدق هذه المقولة ولماذا !!
لازم أصدئها علشان أعرف أعيش وأملي في الحياة ماينقطعش
أجمل مقولة سمعتها فى حياتك ؟؟
قد يري الناس الجرح الذي في رأسك لكنهم لايشعرون بالألم الذي تعانيه
كن فنانا في أي شيء تفعله حتي وأن كنت كناسا فكن ميشيل أنجلو الكناسين
من المغنى اللى بتحبه أوى ؟؟
مش حد بعينه انما أنا بحب الكلمة الجديدة واللحن الجديد بس طبعا لازم يكونوا بيمسوا حاجة فيا
و إيه أحلى أغنية بتحبها ؟؟
حياتي كلها لله أصل ليها قصة معايا لو سنحت الظروف ها ابئي أحكيلكوا عليها
وأغنية بتلف الدنيا بينا ليارا أن شاء الله ها أحطها علي البلوج بعد رمضان
وطبعا بموت في أغاني الأطفال بتاعة زمان
"
غزة " تمثل لك إيه فى حياتك ؟؟
كل مابتحصلي حاجة في حياتي أفتكر الناس اللي عايشين في غزة والعراق
وأصبر نفسي بيهم وأدعيلهم
تصدئوني لو قولتلكوا أنهم بيشجعوني في حياتي بستمد منهم الأرادة خصوصا الأطفال الصغيرين
أعطى لإنتمائك لوطنك درجة من مائة ؟؟
يعني 90%
وماحدش يسألني ال10 % راحوا فين
لو تزوجت و أنجبت بنتين و ولدين أى الأسماء تختار لهم ؟؟
أن شاء الله لو ربنا رزقني ببنتين
ها أسميهم :ضي ونور
والولدين أبئي أسيب باباهم يختار أساميهم ههههههههه
أظن كدا قسمة عدل
عمرك غشيت وأنت صغير؟
ولا وأنا صغيرة ولا وأنا كبيرة مش لسبب غير لأاني بحس أني مهما غشيت ربنا مش هايكرمني
لأني ماببئاش عاوزة انجح وخلاص أو أجيب درجة حلوة والسلام أنا ببئي عاوزة أفرح بنجاحي أدام ربنا وأدام نفسي قبل ما أفرح بيه أدام الناس وبصراحة الغش بيمنعني من حاجة زي دي
بس طبعا كانت بتبئي في محاولات للغش في لحظة ضعف مني ولكن بيتم بترها في الحال
لو أتعرض عليك رشوة كبيرة و انت فى زنقة مالية هتعمل إيه؟؟
لالا حرام عليا
بص أنا ممكن أخون العادات والتقاليد وأخون مبادءي كمان
أنما ما أخونش علاقتي بربنا
وهو اللي هايخرجني من الزنئه اللي انا فيها وهايرزقني بالحلال أن شاء الله
وبعدين أنا عارفة نفسي لو أخدت رشوة مش ها أخلص من تأنيب الضمير
قول 3 صفات ب 3 كلمات بس توصف بيهم شخصيتك ..
خيالية وواقعية في نفس الوقت
هادية
برضه بكلمة واحدة ايه اهم صفة عايزها في شريك حياتك
أنه يكون بيحبني وأكون بحبه
ايه المجال اللى غير دراستك وشايف نفسك فيه قوي ؟؟
المحاماة
بتحب السفر ؟؟
أه طبعا ومين مابيحبش السفر بس بشرط يكون سفر في رحلة وفسح ومع ناس بحبهم وبيحبوني
طب دلوقتى حالا ايه المكان اللى نفسك تكون فيه ؟؟
بصراحة دلوئتي حالا مانفسيش أروح في أي حتة ولا أي مكان
تمرر التاج ده لمين ؟؟
المشكله اني برد علي التاجات اللي عندي متأخر أوي وبيكون معظم المدونين دا ان ماكانش كلهم جاوبوا عليه
فعلشان كدا الدعوة مفتوحة لأي حد عاوز ياخد أي تاج بجاوب عليه
