الميه والهوا

ليلي مراد كانت بتغني وتقول"بحب اتنين سوا الميه والهوا"
وبصراحة عندها حق
بس أنا لومكانها كنت حطيت كلمة بعشق وبدوب جمب كلمة حبيت
يعني أقول"بعشق وبحب وادوب في الميه والهوا"
أجمل حاجه في الدنيا دي الميه والهوا
واللي فعلا أنا بتمناهم من ربنا
ما اكرهش في حياتي أد الجو الحر الرطب اللي مفيهوش نسمة هوا
ومفيش حاجه بدايئني وتنرفزني أد ما أكون في مكان مفيهوش ميه وأنا عطشانة
في حوار غريب بيكون بيني وبين نسمة الهوا الباردة اللي بتلمسني
بحس انها بتداعبني
عارف يعني ايه تكون مدايء وزعلان وجواك هم الدنيا كله
وفجأة تلائي نسمة هوا منعشة تزغزك
ساعتها بس بحس ان ربنا بيحبني وببتسم وبكل رضا بقول "الحمد لله"
منتهي الرومانسيه اللي في الدنيا بتكون بيني وبينها
احساس رائع بينتابني
الميه بئي دي حاجه تانيه
لما بعطش وعطش جامد وربنا يرزقني بكوبايه ميه
واروي عطشي وبكل الرضا والحب والفرح أقول "الحمد لله"

وياسلام علي منظر الميه

منظرها بس ...سواء كانت بحر ,نهر ,ترعه

نازله من الحنفيه ..لو حتي كانت في كوبايه

العين مابتعرفش ترمش علشان ماتضيعش ثانيه واحده من جمال المنظر

ياااااااااااه

الحمد لله يارب
يوم القيامة لو نفتكر ربنا بيمنع عنا الحاجتين دول
الشمس بتقترب من العباد والجو بيبئي حر أوي وكل واحد بيعرق علي أد عمله الصالح
يعني اللي هايعرق كتيير عمله الصالح هايكون قليل
والميه بتتمنع والناس بتعطش وبتعطش جامد
والمسيخ الدجال هايلف علي الناس بميه و
اللي هايكفر هايشربه بس دا طبعا مش صحيح
اقصد اقول إنهم هايتمنعوا عنا يوم القيامه
ومش هايلائيهم غير اللي عمله صالح واللي اخلص النية لله