شوفت بئي!!!

otv قناة otv الفضائيه المصريه بييجي عليها برنامج اسمه عيون
كنت بقلب في القنوات ولائيت البرنامج دا شغال
وكانوا بيتكلموا عن فندق للكلاب وان الفندق دا مش نجمه واحده ولا نجمتين ولا 3 نجمات دول 5 نجمات زي ماقال مذيع الحلقه
واو!!!
ووضحوا ازاي الكلاب بتلائي عنايه فائقه في النضافه والاستحمام والترفيه
وجابوا صورة شاب _زي الورد_ بيحمي الكلب
ياي!!
وشرحوا ازاي ماء الاستحمام دا فريد من نوعه لانه بيحتوي علي
عطور ومواد بتحمي الكلب من الجراثيم والميكروبات
حاجه لطيفه جدا!!!
وبعدين الشاب اللي كان بيحمي الكلب
كان بيتكلم عن الخدمات الطبيه الفظيعه اللي بتلائيها الكلاب في الفندق
وان في دكتور علي اتصال دائم بالفندق للاطمئنان علي صحة الكلاب
دا كله وانا لسه ما اعرفش الفندق دا فين _في أي بلد يعني_
وزي ما توقعت طلع في مصر
للاسف الشديد!!
الحاجه الحلوة جدا ان في اخر البرنامج تلائي المذيع يقولك وبينصحك
لو عاوز الكلب بتاعك يكون في عناية وايدين تطمن وهو معاهم
يبئي لازم توديه الفندق دا

كان علي عيني بس انا ما عنديش كلاب
بس كويس انك عرفتني علشان بعد كدا

في اخر الحلقه وجملة البرنامج المشهورة تلائي صوت عريض يقول بتهكم

شوفت بئي