أصدق ابتسامه

شيء جميل انك تحس إن في حد بيحبك
حد يهمه أمرك
حد انت بتمثل حاجه في حياته
انك مرة واحدة تعرف ان في حد لسه بيحتاجلك
نفسه يكمل عمره معاك
تبتسم
وتبص للسما تدور علي القمر أو تنادي علي الشمس

وتقولهم أنا لسه عايش وفي ناس بتحبني
قلبي صحيح قلب حزين
بس مش عاجز
قادر يحب
وعارف يحلم ويكون قلب جميل
ولسه القلوب التانيه بتتمناه لأنه بينبض لله

تقولهم ان الحزن مش راضي يسيب قلبك لأنه مليان حب
علشان حتي الحزن محتاج للحب

وان الدموع بتتلكك علشان تنزل علي خدودك
وان مش بس لسه في ناس هناك بعيد بتحبك
دي كمان دموعك وجرحك
ولان برغم الجرح والحزن اللي جواك
انت صاحب أصدق ابتسامه

ماكنتش أعرف

ماكنتش اعرف إن أنا برتبط بالأشياء غير لما ضاعت مني الاله الحاسبة في 3 ثانوي
يومها زعلت اوي ومر علي يوم مش ها أنساه في حياتي
لان كان بعد كل ادان بدعي ربنا أنها ترجعلي
مش عاوزة اشتري واحده جديدة
أنا عاوزة اللي ضاعت
والحمد لله ربنا استجاب لدعائي ولائيتها

وماكنتش اعرف إن قلبي جواه كل مشاعر الدنيا

الحزينه

غير لما استقبل حزن جديد هيج وصحي الأحزان القديمة

وماكنتش اعرف إني عايشه حالة حب رائعة مع نفسي ومع قلبي ومع جرحي وفرحي وحلمي وحزني

غير لما ما حسيتش بالفرق

بين إني أكون وحيدة

واني أكون مع الناس لان في الحالتين أنا باكون مع نفسي

ما كنتش اعرف اني ممكن أتخلي عن حلمي القديم في لحظه غير لما واجهت أول تحدي

وماكنتش أعرف إني فيلسوفه غير لما اتناقشت مع مدرس الفلسفة بتاعي في قضيه الحرية والجبريه

وسمعته تاني يوم بيقول تحليلي والامثله اللي أوردتها في كلامي لطلابه في الفصل

وماكنتش اعرف إني ممكن أقول كلام حلو عني بالشكل دا غير لما كتبت الكلام اللي فات

إحنا دايما كدا
حاجات كتيير مابنبئاش عارفينها عن نفسنا
وبتفاجئنا المواقف والظروف بيها

امنح قلبك الحياة

لاتستسلم للألم
لاتستسلم للوهم
ابتسم للحياة
تحدي الظروف
انظر إلي السماء ستجدها صافيه زرقاء
رغم أنها كانت بالأمس ملبدة بالغيوم
تأمل البحر ستجده هادئ
موجاته تداعب بعضها البعض
رغم انه غضب وهاج وثار منذ قليل
احزن وتألم
ولكن لاتدع قلبك لهم
لاتسمح لهم أن يسكنوه
اعلم أنها حياة واحده
واترك روحك تطير في الفضاء
ولا تبكي لان حلمك قد ضاع
فالأحلام كثيرة
احلم من جديد
بداخلك قلب حزين ولكنه رقيق
قلب يفيض مشاعر جميله
قلب اجمل مافيه انه قلبك
فامنحه الحياة لأنه يستحق الحياة